Presidenti turk Rexhep Tajip Erdogan do të takohet me homologun e tij Vladimir Putin në vendpushimin rus të Soçit më 4 shtator për të diskutuar kryesisht eksportet e drithërave të Detit të Zi, thanë dy burime turke për Reuters.
Udhëheqësit do të diskutojnë pasojat nga lufta në Ukrainë si dhe një marrëveshje që lejoi eksportin e grurit ukrainas nëpërmjet Detit të Zi, tha një nga burimet, transmeton Al Jazera.
Marrëveshja e grurit të Detit të Zi, e ndërmjetësuar nga Turqia dhe Kombet e Bashkuara në 2022, përfundoi pasi Rusia u tërhoq në korrik.
Që atëherë, Ankaraja ka kërkuar të bindë Moskën që t’i kthehet marrëveshjes.
Ndërkaq, sipas Departamentit Amerikan të Shtetit, SHBA-ja dhe Rumania po punojnë për të rritur eksportet e drithërave ukrainase përmes transportimit nëpër lumin Danub. Kjo po shihet si alternativë për nismën e dështuar të Detit të Zi.
Sipas zyrtarëve amerikanë, Uashingtoni dhe Bukureshti janë duke studiuar mundësitë që “potencialisht të dyfishohen” eksportet e drithërave që aktualisht kalojnë përmes Danubit.
“Ne po shikojmë që të mbështesim rrugë alternative: rruga e Danubit është rruga kryesore aktualisht. Kjo rrugë kalon përmes ujërave territoriale të NATO-s. Prandaj, është një rrugë shumë atraktive për ne në mënyrë që të mbajmë një korridor më të sigurt”, tha zyrtari në kushte anonimati.
p.k\dita
