Inspektorati i Lartë i Drejtësisë i ka paraqitur këtë të enjte një kërkesë Gjykatës Kushtetuese për shkarkimin e anëtarit të Këshillit të Lartë të Prokurorisë (KLP), Olger Eminaj.
ILD i ka kërkuar Gjykatës Kushtetuese shkarkimin e anëtarit të KLP-së pas dyshimeve për veprime me natyrë seksuale, të kryera prej tij.
Sipas institucionit, nga verifikimet e kryera ka rezultuar se anëtari i KLP-së ka ndërmarrë veprime që dëmtojnë besimin e publikut ndaj sistemit të drejtësisë, çka ka çuar në nisjen e procedurës për shkarkimin e tij.
Ndërkohë, mësohet se Gjykata Kushtetuese ka riregjistruar çështjen dhe ka caktuar si relatore gjyqtaren Marjana Semini. Gjykata pritet të shqyrtojë kërkesën e ILD-së dhe të vendosë mbi fatin e Olger Eminajt.
Rasti i denoncuar nga “STOP”
Qytetarja me inicialet R.M. kishte shkuar në zyrat e KLP-së për të kërkuar ndihmë, pasi ishte dhunuar nga bashkëshorti. Nga dhuna e ushtruar ajo kishte humbur fëmijën dhe nuk mund të lindte më. Megjithatë, bashkëshorti i saj e kishte denoncuar për përndjekje.
Në Prokurorinë e Tiranës, R.M. u përball me sfida të tjera, përfshirë një kallëzim për fyerje nga një prokurore. Më pas ajo iu drejtua Inspektoratit të Lartë të Drejtësisë, por nuk mori përgjigje. Në KLP, kryetarja Mirela Bogdani i kishte kthyer një përgjigje, duke i kërkuar Prokurorisë së Tiranës të hetonte rastin.
Pas kësaj, R.M. i shkroi anëtarit të KLP-së Olger Eminaj, i cili filloi t’i dërgonte mesazhe me përmbajtje personale. Sipas “Stop”, Eminaj ka zhvilluar biseda me përmbajtje seksuale dhe ka dërguar foto intime nga zyra e tij, gjatë orarit të punës.
”Shkova në banjo dhe mbarova punë me b… tënde në mendje”, i shkruan ai shtetases R.M.
Më pas, i dërgon 3 foto të organit të tij gjenital, më 14 maj 2025, në orën 10 paradite, në orarin zyrtar të punës.
Në mesazhe të tjera i kërkon të blejë viagra dhe lodra seksi.
Kush është Olger Eminaj?
Eminaj është diplomuar në Juridik në vitin 2002 dhe ka përfunduar Shkollën e Magjistraturës si prokuror në vitin 2007. Prej vitit 2009 ka ushtruar detyrën e prokurorit, duke pasur përvojë të gjatë në ish-Task Forcën e Korçës, ku ka qenë edhe drejtues.
