Ministri i Brendshëm gjerman, Alexander Dobrindt, dëshiron t’i përgatisë më mirë nxënësit për skenarët e luftës dhe fatkeqësive. Ai e konsideron këtë një masë paraprake të arsyeshme, ndërsa të tjerët e shohin si alarmizëm. Krizat, fatkeqësitë dhe lufta janë trajtuar prej kohësh në shkollat gjermane, të paktën në një nivel abstrakt dhe akademik. Tani, Ministri i Brendshëm gjerman Alexander Dobrindt, anëtar i Bashkimit Kristian Social (CSU), dëshiron që shkollat të ofrojnë trajnime në këta skenarë.
“Një herë në vitin shkollor, nxënësit më të rritur duhet të ndjekin një modul mësimor të thelluar që mbulon skenarë të ndryshëm kërcënimesh dhe mënyrën e menaxhimit të tyre”, tha Dobrindt për Handelsblatt. Gatishmëria për kriza duhet të jetë një pjesë integrale e kurrikulës shkollore.
Iniciativa e Dobrindt përputhet me deklaratat e bëra nga kancelari Friedrich Merz, i cili, në përgjigje të kërcënimeve hibride të Rusisë, deklaroi: “Ne nuk jemi në luftë, por nuk jemi më as në paqe”. Shumë ekspertë besojnë se një sulm rus në territorin e NATO-s është i mundur para fundit të dekadës. Gjermania dëshiron të përgatitet, duke forcuar ushtrinë dhe duke përmirësuar mbrojtjen civile.
Shoqata e mësuesve mirëpret propozimin
Shoqata Gjermane e Mësuesve (DL), e cila përfaqëson afërsisht 165.000 mësues, e mbështet propozimin e Dobrindt-it. Presidenti i saj, Stefan Düll, i tha DW: “Duhet të jemi të ndershëm dhe ta themi qartë: lufta ka hyrë prej kohësh në klasë.” Të rinjtë kanë të drejtë të flasin hapur për çështjet që mund t’i prekin. Trajnimi për gatishmëri në rast emergjence mund t’i ndihmojë ata të mësojnë rreth rrugëve të mundshme të veprimit dhe të ndërtojnë rezistencë.
Quentin Gärtner, Sekretari i Përgjithshëm i Konferencës Federale të Studentëve (BSK), Gärtner nuk ka marrë pjesë në asnjë ushtrim përgatitor për luftë ose krizë. “E vetmja gjë që di është alarmi standard i zjarrit”, tha për DW sekretari i përgjithshëm i Këshillit Federal të Studentëve (BSK), i cili përfaqëson interesat e të rinjve. “Ka kuptim të përgatitemi për skenarë fatkeqësish.” Kjo do të nxiste një “shoqëri rezistente”. Megjithatë, është e rëndësishme që punonjësit socialë të shkollave dhe psikologët t‘i shoqërojnë këto kurse, pasi jo të gjithë studentët janë të përgatitur mendërisht për skenarë të tillë.
Reagime të ndryshme politike
Partia opozitare E Majta e ka kritikuar ashpër propozimin. Kryetarja e grupit parlamentar, Nicole Gohlke, i tha AFP-së se masat ishin “alarmuese”, veçanërisht në lidhje me fëmijët dhe adoleshentët. AfD gjithashtu shprehu mosmiratimin e saj. Politikani Gottfried Curio akuzoi Dobrindtin se lë përshtypjen sikur lufta është e pashmangshme.
Të Gjelbrit, nga ana tjetër, ofruan mbështetjen e tyre. Kreu i partisë Felix Banaszak i tha RTL: “Jo, kjo nuk është alarmizëm.” Megjithatë ai nuk është i bindur se një kurs shtesë në vit është i mjaftueshëm për të përgatitur në mënyrë të përshtatshme studentët.
Qeveria federale mund të japë vetëm rekomandime për arsimin shkollor. Vendimi në lidhje me kurrikulat shkollore u takon megjithatë landeve federale.
Miliarda për mbrojtjen civile
Qeveria federale planifikon të zgjerojë masivisht mbrojtjen civile dhe menaxhimin e fatkeqësive. Deri në vitin 2029, afërsisht dhjetë miliardë euro janë caktuar për përmirësimin e strehimoreve, sistemeve të paralajmërimit, automjeteve të emergjencës dhe rezervave të ujit. Dobrindt gjithashtu i kërkoi publikut të grumbullojë furnizime: “Furnizime për disa ditë, një elektrik dore, bateri ose një radio dore – ky nuk është alarmizëm, është gatishmëri.”
Japonia apo Polonia si modele?
Në Japoni, gatishmëria për fatkeqësi fillon që në kopsht. Stërvitjet e rregullta janë të zakonshme në të gjitha nivelet e shkollës, duke pasur parasysh frekuencën e fatkeqësive natyrore dhe kërcënimin që paraqet Koreja e Veriut.
Polonia gjithashtu ndjek një qasje të ngjashme. Të rinjtë e moshës 14 deri në 15 vjeç ndjekin kurse të detyrueshme mbi armët dhe sigurinë. Ata nuk shtijnë me municion luftarak, por praktikojnë çmontimin, ngarkimin dhe shkarkimin e armëve. Ata gjithashtu ushtrohen duke përdorur lazer dhe fishekë të zbrazët.
Marta Stolinska, nga Shkolla Nicolas Copernicus në Skarszewy, i tha DW: “Mendoj se është ide e mirë. Jeta është e frikshme këto ditë; duhet të jesh i përgatitur për çdo gjë.” Studentë si Alan Jaron e quajnë trajnimin “zbavitës”: “Është interesante të mbash një armë dhe të qëllosh.” Prindërit dhe mësuesit e mbështesin programin.
Në Gjermani, kjo qasje pritet me skepticizëm të konsiderueshëm, pasi kultura është më pacifiste. „Oborret e shkollave gjermane nuk janë fusha paradash në kazerma”, tha për DW Stefan Düll, nga shoqata e mësuesve. Të mësuarit për të shtënë nuk është “punë e studentëve, por e ushtrisë”, shtoi ai. Përfaqësuesi i studentëve, Quentin Gärtner e hedh poshtë modelin polak: “Trajnimi për armët e zjarrit sigurisht që nuk është pjesë e parandalimit të mirë të fatkeqësive.”
DW
