Anija e marinës italiane, “Libra”, mbërriti të premten në portin e Shëngjinit me 40 emigrantë të transferuar nga Italia, pasi qeveria e Romës ndryshoi rregullat për përdorimin e qendrës së paraburgimit në Shqipëri.
Emigrantët, me shtetësi të ndryshme, u dërguan menjëherë në Kampin e Gjadrit, ku do të qëndrojnë deri në riatdhesimin përkatës, sipas një marrëveshjeje të nënshkruar në vitin 2023 mes dy qeverive.
Pas ndryshimeve të fundit ligjore, Italia mund të transferojë emigrantë që ndodhen aktualisht në qendrat e riatdhesimit dhe paraburgimit në Itali, përfshirë ata që u është refuzuar mbrojtja ndërkombëtare ose që kanë shkelur kushtet e qëndrimit.
Sipas një njoftimi nga Komisioni Evropian, kjo praktikë është në përputhje me ligjin e BE-së, megjithatë, organizatat për të drejtat e emigrantëve kanë shprehur shqetësimin e tyre për përkeqësimin e kushteve të paraburgimit në kampin e Gjadrit dhe mundësitë e kufizuara për akses në mbrojtje ligjore.
Mediat italiane raportuan se nuk është ende e qartë se si janë përzgjedhur emigrantët e fundit dhe nga cilat qendra janë transferuar. Sidoqoftë, 40 emigrantët mund të mbahen në Shqipëri deri në 18 muaj në pritje të riatdhesimit.
Qendra e Paraburgimit dhe Riatdhesimit në Gjader, CPR, është ndërtuar dhe menaxhohet nga qeveria italiane në bazë të një memorandumi mirëkuptimi të nënshkruar në vitin 2023 ndërmjet kryeministrit shqiptar, Edi Rama, dhe homologes së tij italiane, Giorgia Meloni.
Ardhjet e fundit janë pjesë e një strategjie të re të formuar nga qeveria italiane për të ringjallur marrëveshjen e lëkundur.
Qendra, e planifikuar fillimisht për të pritur emigrantët e shpëtuar nga Italia në ujërat ndërkombëtare në pritje të një vendimi përfundimtar për kërkesat e tyre për mbrojtje ndërkombëtare, i ka kushtuar Italisë rreth një miliard euro, por nuk ka funksionuar kurrë.
Por përpjekjet e mëparshme për të transferuar emigrantët atje dështuan pasi gjyqtarët italianë refuzuan të vërtetonin ndalimin e emigrantëve në Shqipëri, duke përmendur ligjet e BE-së, dhe apeluan në Gjykatën Evropiane të Drejtësisë për fjalën e fundit.
