Dmitry Medvedev, ish-presidenti i Rusisë, ka paralajmëruar se konfrontimi i Moskës me Perëndimin do të zgjasë “me dekada”, kurse konflikti i saj me Ukrainën mund të bëhet “i përhershëm”.
Në një artikull për gazetën qeveritare Rossiiskaya Gazeta, Medvedev tha se tensionet midis Rusisë dhe Perëndimit ishin “shumë më të këqija” sesa gjatë krizës së raketave kubane të vitit 1962, kur bota u zhyt në prag të një zjarri bërthamor, shkruan Reuters.
Një luftë bërthamore ishte “mjaft e mundshme”, por nuk kishte gjasa të kishte ndonjë fitues, u shpreh Medvedev, i cili ka thënë vazhdimisht se mbështetja perëndimore për Ukrainën rrit shanset për konflikt bërthamor.
Ai përmendi dallime mbi Ukrainën, drejtimin e njerëzimit dhe mënyrën se si ishte strukturuar rendi botëror.
Medvedev theksoi se Moska është ende e përkushtuar për të ndaluar anëtarësimin e Ukrainës në NATO.
“Qëllimi ynë është i thjeshtë – të eliminojmë kërcënimin e anëtarësimit të Ukrainës në NATO. Dhe ne do ta arrijmë atë. Në një mënyrë ose në një tjetër,” tha ai.
p.k. / dita
