Merret vendimi, Apeli i GJKKO lë në burg kryebashkiakun Erion Veliaj, liron biznesmenin Abule

Veliaj mbetet në burg, pasi Apeli i GJKKO i rrëzoi ankimin për masë më të lehtë sigurie kundrejt garancisë pasurore. Zbutet masa në arrest shtëpie për biznesmenin Elman Abule të akuzuar për pastrim parash. Në fuqi masa detyrim paraqitjeje për Palushin, Fushën dhe Sulën. Rrëzohet edhe kërkesa e Xoxës për heqjen e sekuestros së llogarive bankare

1Apeli i Posaçëm ka lënë në fuqi masën arrest me burg për Kryebashkiakun e Tiranës Erion Veliaj, pas dy seancave maratonë.

Gjyqtari Engert Pëllumbi shpalli sot vendimin duke e lënë Veliajn në qeli, ku mbahet prej më shumë se një muaji nën akuzë për korrupsion pasiv e pastrim të parave.

Veliaj kërkonte masë më të butë sigurie edhe kundrejt garancisë pasurore, por kërkesa u rrëzua nga Pëllumbi.

Nga ana tjetër, gjyqtari i Posaçëm ka zbutur masën e sigurisë nga arrest me burg në arrest shtëpie për biznesmenin Elman Abule, i akuzuar për pastrim parash në çështjen e Veliajt.

Abule, kërkoi masë tjetër me argumentin se mungesa e tij po i shkatërron biznesin ndërsa ka edhe arsye familjare.

Masa detyrim paraqitjeje është lënë në fuqi për 3 biznesmenët Gentian Sula, Meriman Palushi dhe Shkëlqim Fusha, të cilët akuzohen për korrupsion aktiv.

Veliajt dhe avokatëve u mbetet tashmë edhe një hap i fundit: rekursi në Gjykatën e Lartë.

Në të kundërt Veliaj do ta kalojë të gjithë periudhën e hetimeve ndaj tij dhe kohën që do t’u duhet prokurorëve që të bëjnë gati dosjen për gjyq, në qeli.

Po sot, i njëjti gjyqtar Pëllumbi ka rrëzuar edhe një kërkesë të bashkëshortes së Veliajt, Ajola Xoxa, për heqjen e sekuestros së llogarive bankare. Xoxa, Fatmir Bektashi dhe Sokol Kryeziu nuk e kanë ankimuar masën detyrim paraqitjeje.

Çfarë ndodhi dje në seancë?

Seanca e cila zgjati afro 3 orë, nisi me fjalën e avokatëve të Veliajt që thanë qëndrimin e tyre në lidhje me provat e reja që u paraqitën nga SPAK të martën, disa biseda të përgjuara gjatë kohës që Veliaj ndodhej në paraburgimin e Durrësit. Avokati Artur Selmani deklaroi në gjykatë, se përgjimet telefonike ku Veliaj fliste me familjarët e tij nuk mund të merren si kërcënim apo intimidim për askënd, dhe nuk mund të përdoren për të rënduar pozitën e kryebashkiakut, i cili kërkon një masë më të butë sigurie, edhe përkundrejt garancisë pasurore. Avokati Artur Selmani i mëshoi faktit se nuk ka asnjë rrezik që në liri, Veliaj të prishë provat, të arratiset apo të intimidojë gjyqtarët.

Në të njëjtën linjë me avokatin ishte edhe vetë kryebashkiaku Veliaj, i cili tha në seancë se në përgjimet nuk ka asgjë sekrete, teksa kërkoi seancë të hapur për mediat.

lajm në përditësim…