“Dritares” kryesore të transferimeve të Rubin Kazanit po i vjen fundi. Sulmuesi Mirlind Daku ka firmosur të dielën marrëveshjen për një kontratë të re me klubin. Një njoftim zyrtar për këtë firmë erdhi të dielën dhe Mirlindi është bërë një nga lojtarët më të paguar të RPL-së.
Sipas “BUSINESS Online”, marrëveshja e re do të jetë e vlefshme deri në vitin 2029 (e vjetra ishte e vlefshme deri në vitin 2026). Skuadra e lojtarit shqiptar këmbënguli për një zgjatje të kontratës. Deri në fund të saj, Mirlindi do të jetë 31 vjeç, çka do të thotë se pjesa më e madhe e karrierës së tij profesioniste do të ketë kaluar te Rubini. Gjithashtu, sipas informacioneve, klubi ofroi një pagë prej 2.5 milionë eurosh neto në vit. Pjesa tjetër janë bonuse.
Kjo pagë është një rritje e konsiderueshme në krahasim me 700 mijë eurot që fitonte Mirlindi më parë. Në të njëjtën kohë, Zeniti i ofroi Mirlindit kushte shumë më të mira kontraktuale. Me të gjitha bonuset, në Shën Petersburg, ai do të fitonte pothuajse 4 milionë euro. Kjo do të thotë se Dakut nuk ka shkuar dëm “djersa”. Ai, në dy sezone ka shënuar 25 gola si dhe ka dhënë 12 asiste. Bazuar në burimet e hapura, vetëm dy lojtarë do të fitojnë më shumë se Daku në kampionatin rus. Xhon Kordoba nga Krasnodar (4 milionë euro) dhe Vilmar Barrosh nga Zenit (5 milionë euro). Të dyja klubet janë në konkurrencë të vazhdueshme për kampionatin. Kordoba është golashënuesi më i mirë i ekipit dhe Barrosh është zëvendëskapiteni i Zenitit.
NEGOCIATAT – Mund të thuhet se negociatat midis Dakut dhe Rubinit nuk ishin të thjeshta. Palët komunikuan verbalisht me njëratjetrën gjatë gjithë vitit. Në vjeshtë ose dimër, Mirlindi nuk kërkoi paratë, për të cilat ishte rënë dakord në qershor. Pas përfundimit të sezonit, pasi kuptoi mundësinë reale të fitimit të parave në sfondin e negociatave me Zenitin, kërkesat e Mirlindit u rritën ndjeshëm. Sapo transferimi te Zeniti dështoi, rifilluan negociatat me Rubinin. U tha se agjentët manipuluan negociatat me interesin e Dinamos për Dakun, por askush nuk ia ktheu krahët njëri-tjetrit. Klubi e “priti” lojtarin në gjysmë të rrugës, Daku ia shtriu dorën Rubinit.
SHUMA “X” – Palët ranë dakord gjithashtu për një klauzolë të veçantë në kontratë. Opsioni për një shitje të mundshme. Domethënë, një shumë të caktuar fikse (e cila nuk dihet, por mendohet 10 milionë euro), të cilën pretendenti (blerësi) do t’ia paguajë klubit për Dakun dhe të ketë të garantuar marrjen e tij. Pika e rëndësishme është se kjo shumë është vendosur vetëm për klubet e huaja. Nëse dikush nga RPL dëshiron ta joshë Dakun, atëherë do të jetë e nevojshme të negociohet me Rubinin.
QENDRA E PROJEKTIT – Sidoqoftë, Rubini e siguroi veten nga largimi i sulmuesit falas dhe e bëri Mirlindin qendër të projektit të tij. Kjo është një lëvizje e fortë nga Kazani, saqë ata janë të vendosur të përmirësojnë rezultatet e tyre sezonin e ardhshëm. Sigurisht, për këtë, nuk mjafton vetëm të zgjasë kontratën me Dakun që ka ruajtur pozicionin e liderit dhe golashënuesit më të mirë. Rubini duhet të kalojë në objektiva të tjera. Kjo nuk do të thotë vetëm me nënshkrimin e lojtarëve të rinj, por edhe ruajtja e bërthamës së skuadrës.
Panorama Sport
