“Na kanë ardhur dy letra për grup-kapitujt e tjerë”, Rama: Shqipëria me hapa të shpejtë drejt BE, teksa bufi zien…

Kryeministri Edi Rama është shprehur se Shqipërisë i kanë ardhur dy letra për dy grup-kapituj të tjerë.

Rama u shpreh se kjo është shpejtësi e jashtëzakonshme ecurisë së negociatave, duke theksuar se Shqipëria po përmbush ato që duhet të përmbushë me hapa të shpejtë.

Kreu i qeverisë ironizoi edhe opozitën, duke theksuar se “11 Maji, fundi i historisë së një kënete me një buf! I rri si hije e mallkimit Shqipërisë mbi kokë”.

“Brenda mandatit të katërt të ngremë flamurin kuq e zi në majin e shumëëndërruar të BE. Na kanë ardhur dy letra, njëra në fund të janarit dhe tjetra në fund të shkurtit për të hapur dy grup kapituj të tjerë. Është shpejtësi e jashtëzakonshme ecurisë së negociatave sepse Shqipëria po përmbush ato që duhet të përmbushë me hapa të shpejt, ndërsa që këtu zihet kazani me ujin e kënetës edhe me bufin plak të kënetës aty në buzë të kazanit duke u fryrë të gjithë zjarreve të mundshme të së shkuarës që do të shuhen të gjitha dhe 11 Majit do të jetë fundi i fundit të historisë së një kënete me një buf që ka marrë peng opozitën shqiptare, faktisht i rri si një hije e mallkimit që prej 1`912 Shqipërisë mbi kokë.

BE nuk i hap asnjë derë askujt që nuk është gati për të kapërcyer pragun. Ne kemi hapur disa dyer, dy dyer të reja vetëm në fund të janarit dhe shkurtit kemi marrë letrën dhe do të hapen në mars e në prill”, tha Rama.

Kryeministri Edi Rama i është përgjigjur një komentuesi, që e akuzon për blerje votash.

Rama u shpreh se “800 mijë njerëz nuk ka perëndi që i blen, janë vullnet popullor dhe këtë nuk e luan topi”.

Më tej, ironizoi opozitën duke thënë se blerja e votave është “alibia idiote e humbësve kronikë që nuk fitojnë edhe pse nuk arrijnë të kuptojë pse humbasin”.

“Bajat janë të gjithë ata që e lidhin votën e popullit për PS dhe mua, me blerje dhe shitje. 800 mijë njerëz nuk ka perëndi që i blen, janë vullnet popullor dhe këtë nuk e luan topi.

Është thjesht alibia idiote e humbësve kronikë që nuk fitojnë edhe pse nuk arrijnë të kuptojë pse humbasin.  Dhe duke ia mohuar të vërtetën vetes mbeten po humbësa, ngelësa dhe fatkeq për faktin se nuk pranojnë të vërtetën se humbin se ne jemi më të fortë, më të zotë, më të mirë dhe jemi të duhurit për këtë vend.

Përsa u përket rrenave, unë di që nuk kam as arsye dhe as edukatën e njeriut që të rren për të përfituar, qoftë edhe një  votë të vetme“, tha ai.

j.l./ dita