Leter ngushellimi nga Profesor Rexhep Qosja:
Me pikëllim e mësova lajmin për ndarjen nga jeta të artistit Mirush Kabashi!
U shpreh ngushëllime familjes së tij, artistëve, miqve e adhuruesve të shumtë, anëtarëve të Akademisë së Arteve dhe Shkencave të Shqipërisë.
Mirush Kabashin natyra e kishte dhuruar me talent të madh me të cilin ai e shprehu në teatër, në kinematografi, në punën pedagogjike dhe në veprimtari të tjera shoqërore, kulturore e kombëtare.
Ai me të arriturat e tij i kontribuoi shumë kohezionit shoqëror, kulturor, shpirtëror, moral e kombëtar të shqiptarëve.
Të arriturat e gjithanshme artistike, pedagogjike e kombëtar e bëjnë të përjetshëm emrin e tij dhe kujtimin për te në historinë e popullit shqiptar.
Rexhep Qosja
Ngushëllime familjes të të ndierit, aktorit të madh kombëtar, Mirush Kabashi!
Ndërrimi i jetës së tij, është nje humbje e madhe dhe e pazëvëndësueshme për familjen e të afërmit, shokët e miqtë, spektatorët e panumurt dhe kryesisht artin kombëtar Shqiptarë.
Kam pas fatin, që ta njoh e bisedoj me të si aktor me talent të rrallë dhe interpretues i shumë roleve e karaktereve, që vetëm ai mundi t’i realizonte me një plastikë të rrallë e interpretim brilant.
E kujtoj vizitën e të ndierit Mirush bashkë me të vëllain e tij, Kujtimin në shtëpinë time në nëntor të vitit 1981. Kujtoj bisedat miqësore që bëmë. Më treguan, se babai i tyre e kishte njohur babain tim, që s’arrita ta njoh, sepse u vra në vitin 1943 si dëshmorë në luftë.
U gëzova, sepse edhe djemtë e mikut të babait tim, u bënë miqtë e mij. Shumë miq të tij fillova t’i njoh shumë vonë në Dibër e Shqiperi.
Përkulem me nderim e respekt para jetës e kontributit të madh, që dha aktori e pedagogu i shquar i Universitetit të Arteve, që përgatiti qindra aktor shqiptarë nga të gjitha trojet, Mirush Kabashi!
Mirush Kabashi do të vazhdojë të jetojë me kontributin e madh që ka dhënë e pasurinë e madhe, që ka lënë pas në fushën e teatrit e të filmave të shumte e të krijimtarisë, duke mbetur si një nga emblemat e shquara e të nderuar të artit e kulturës shqiptare në të gjitha kohët e sistemet politiko-shoqërore.
U prehtë në paqe në mëmëdheun e tij!
Tefta Cami-Cani- ish-ministre e Arsimit dhe Kulturës
Tiranë, e mërkurë, 6 dhjetor, 2023
I propozoj Bashkisë të Tiranës, Bashkisë të Durresit dhe Bashkisë të Gjakovës ta përjetësojë emrin e aktorit të madh Mirush Kabashi në një nga institucionet e kulturës, duke i vënë emrin e tij.
Tefta Cami- Cani-ish-ministre e Arsimit dhe Kulturës
Tiranë, e mërkurë, 6 dhjetor, 2023