Presidenti i Ukrainës, Volodymyr Zelenskyy, ka dhënë një mesazh të fortë në Konferencën e Sigurisë të Mynihut, duke theksuar urgjencën për anëtarësimin e Ukrainës në NATO. Presidenti ukrainas kërkoi një qëndrim më të fortë të kombeve europiane për të marrë nën kontroll të ardhmen e sigurisë së tyre.
Zelenskyy tha se, nëse Ukraina nuk siguron anëtarësimin në NATO, duhet të krijohen kushte për ndërtimin e një strukture alternative të ngjashme me NATO-n brenda vendit. Ai theksoi gjithashtu se anëtari më i fuqishëm i NATO-s në këtë moment duket se është Presidenti rus, Vladimir Putin.
“Ne nuk mund të pranojmë një armëpushim pa garanci të vërteta sigurie,” tha Zelenskyy, duke riafirmuar vendosmërinë e Ukrainës për të mbetur një pjesëmarrëse aktive në vendimet që prekin të ardhmen e saj. Ai gjithashtu theksoi se Ukraina nuk do të pranojë “marrëveshje të arritura pas shpine” pa përfshirjen e saj në diskutime.
Në fjalën e tij drejtuar liderëve europianë, Zelenskyy bëri thirrje për një rritje të pavarësisë së kontinentit në fushën e mbrojtjes, duke kërkuar që armët të prodhohen plotësisht në Europë. “Evropa duhet të vendosë për të ardhmen e saj,” tha ai, duke sinjalizuar një kalim drejt një autonomie më të madhe të Europës në çështjet e sigurisë.
Presidenti ukrainas gjithashtu theksoi se ka ardhur koha për krijimin e një ushtrie europiane, duke paralajmëruar se trupat koreano-veriore që luftojnë përkrah forcave ruse janë duke mësuar taktika moderne të luftës.
Ai vijoi kërkesat për për ndihmë të vazhdueshme ushtarake nga aleatët perëndimorë.
“Ushtria jonë e vetme nuk është e mjaftueshme, na duhet mbështetje nga ju,” tha Zelenskyy.
“Ukraina ka informacione të qarta që tregojnë se Rusia planifikon të dërgojë trupa në Bjellorusi këtë verë”, shtoi presidenti i Ukrainës.
Ai bëri thirrje që liderët europianë të veprojnë menjëherë për sigurinë e tyre, duke pyetur:
“Nëse Rusia nis një sulm ose një operacion tjetër në Evropë, a janë ushtritë tuaja të gatshme për ta përballuar?”
i.b./dita
