Presidenti amerikan Donald Trump ka denoncuar se ka qenë viktimë e një “sabotimi të trefishtë” gjatë fjalimit të tij në Asamblenë e Përgjithshme të Kombeve të Bashkuara. Në një postim të gjatë të publikuar në rrjetin e tij social Truth, Trump ka renditur tre episodet “ogurzeza” që sipas tij kompromentuan fjalimin e tij në OKB: një shkallë lëvizëse e bllokuar, një teleprompter i fikur dhe mungesa e audios në sallë. “Jo një, jo dy, por tre ngjarje shumë të liga!”, ka shkruar ai, duke shtuar se i ka kërkuar Sekretarit të Përgjithshëm të OKB-së hapjen e një hetimi dhe marrjen e regjistrimeve të sigurisë. Megjithatë, shpjegimet e ofruara nga Kombet e Bashkuara dhe burime zyrtare të brendshme rrëzojnë narrativën e Trump, duke ia atribuar përgjegjësinë për keqfunksionimet pikërisht rrethit të tij.
Shkalla lëvizëse e bllokuar
Episodi i parë i kontestuar lidhet me shkallën lëvizëse, e cila pësoi një ndalesë të papritur ndërsa Trump dhe Zonja e Parë Melania po e përdornin për të hyrë në zonën e asamblesë. Sipas rrëfimit të presidentit, ndalesa e menjëhershme pothuajse mund t’i kishte shkaktuar një rrëzim. Por OKB-ja ka dhënë një shpjegim teknik: bllokimi u shkaktua nga aktivizimi aksidental i një mekanizmi sigurie të vendosur në majë të shkallëve lëvizëse.
Stéphane Dujarric, zëdhënës i Sekretarit të Përgjithshëm António Guterres, ka sqaruar se sensori u aktivizua kur një videograf i delegacionit amerikan, duke ecur mbrapsht për të filmuar mbërritjen e presidentit, preku zonën e ndjeshme të sistemit. “Mekanizmi është projektuar për të parandaluar që njerëzit ose objektet të zvarriten në sistem”, shpjegoi Dujarric. Bllokimi ishte i përkohshëm dhe sistemi u riaktivizua menjëherë pas kësaj.
Pavarësisht këtyre shpjegimeve, Trump ka vazhduar të mbrojë tezën e sabotimit, duke kërkuar madje që “personat përgjegjës të arrestohen”. Zëdhënësja e Shtëpisë së Bardhë, Karoline Leavitt, ka folur për një “akt të qëllimshëm” dhe ka kërkuar masa të menjëhershme. Por deri më tani nuk ka elementë që konfirmojnë një gjest me dashakeqësi.
Teleprompteri dhe mungesa e audios gjatë fjalimit
Pika e dytë e ngritur nga Trump lidhet me keqfunksionimin e teleprompter-it, të cilin – sipas tij – u “fik plotësisht” në fillim të fjalimit. Edhe në këtë rast, megjithatë, përgjegjësitë duket se i përkasin vetë administratës së tij. Një funksionar i Kombeve të Bashkuara, i pyetur nga disa media ndërkombëtare, ka deklaruar në formë anonime se “teleprompteri menaxhohej drejtpërdrejt nga Shtëpia e Bardhë” dhe jo nga stafi i OKB-së.
Në fund të fjalimit, vetë presidentja e Asamblesë së Përgjithshme, Annalena Baerbock, ka theksuar me një dozë ironie se “teleprompter-ët e Kombeve të Bashkuara funksionojnë në mënyrë perfekte”.
Së fundi, Trump ka denoncuar mungesën e audios në sallë, duke pohuar se shumë delegatë nuk mund ta dëgjonin ndryshe veçse përmes kufjeve për përkthim simultan. Edhe ky detaj është sqaruar nga burime të OKB-së: audio në sallë është i strukturuar për të funksionuar përmes sistemeve të interpretimit, të cilat u mundësojnë delegatëve të ndjekin fjalimet në një nga gjashtë gjuhët zyrtare të Kombeve të Bashkuara. Nuk janë konstatuar anomali teknike në sistemet e amplifikimit.
Një “autosabotim” i Shtëpisë së Bardhë
Provat dhe deklaratat zyrtare në dispozicion duket se e hedhin poshtë teorinë e “sabotimit të trefishtë” të Donald Trump. Ndërprerja e shkallëve lëvizëse, dështimi i teleprompterit dhe problemet e supozuara audio kanë të gjitha shpjegime konkrete dhe teknikisht të shëndosha. Dhe të gjitha çojnë në një burim të vetëm: stafin e vetë presidentit./ La Repubblica
Sa shume ngjason me shimpazene ptrsidenti Tramp ! Te habit me kete paraqitje ,
Sa shume ngjason me shimpazene presidenti Tramp ! Te habit me kete paraqitje ,