Presidenti amerikan Donald Trump ka deklaruar se po sheh për një rreze të gjerë vendesh ku të mund të vendosë popullsinë e Gazës, e zhvendosur për shkak të luftës me Izraelin.
“Ne kemi vende të tjera që duan të përfshihen në këtë nismë”, deklaroi Trump në një konferencë shtypi nga Dhoma Ovale.
I pyetur nga një gazetar nëse mes këtyre vendeve bën pjesë edhe Shqipëria, Trump është përgjigjur duke thënë: “Po, sigurisht”.
Deklarata e tij ka ardhur pavarësisht se autoritetet shqiptare e kanë përjashtuar një mundësi të tillë.
Deri më sot, Shqipëria ka pritur refugjatët afganë që u larguan nga vendi i tyre pas tërheqjes së trupave amerikane në vitin 2020, si dhe eksponentë dhe disidentë të opozitës iraniane, që në vendin e tyre kontestohen nga regjimi.
Pak ditë më parë, vetë kryeministri Edi Rama deklaroi se lajmi se në vendin tonë do të mbërrinin 100 mijë palestinezë ishte vetëm një sajesë.
Duke iu përgjigjur drejtpërdrejt ndjekësve të tij në rrjetet sociale, kreu i qeverisë tha se zërat për ardhjen e palestinezëve ishin zëra të ardhur nga ajo që e quajti “këneta” e opozitës.
Rama kujtoi se Shqipëria e ka njohur shtetin e Palestinës dhe theksoi se “nga zemra e Evropës, ne nuk mund të bëjmë më shumë se çdo vend tjetër evropian për një çështje të tillë”.
i.b./dita
