VIDEO: Pamjet më të qarta të masakrës në Rinas: Këmbyen armët poshtë statujës së Nënë Terezës, sheshi boshatiset, e gjithë vrasja në 1.33 sekonda

Kjo kamera biznesi pranë rrethrrotullimit të aeroportit të Rinasit tregon qartë me detaje në 1 minutë e 33 sekonda të gjithë dinamikën e atentatit të djeshëm.

Në fillim të videos shihet “Toyota” e autorëve duke pritur me bllokazh në njërin cep të rrethrrotullimit të Rinasit. Informatori i lajmëron se makina “Mercedes Benz” me ngjyrë të bardhë, ku ndodhej shënjestra Gilmando Dani dhe miku i tij Muçi Shaljani (Sheqeri), po vinte në drejtim të tyre.

Në orën 14:14 Toyota shihet që lëviz dhe pozicionohet në krahun tjetër të rrethrrotullimit. Pak sekonda më pas, shihet të hyjë brenda rrezes së kësaj kamere, Benzi i bardhë i viktimave. Njëherazi hapen  dyert e makinës Toyota, nga ku dalin 3 persona të maskuar që hapin zjarr njëherësh me kallashnikovë mbi Benzin.

Në këtë moment shihet qartë se shumë makina të tjera dhe qytetarë këmbësorë ishin duke kaluar në rrethrrotullim. Vetëm fati e deshi të mos lëndohej askush tjetër. Plumbat e nisura për Danin përplasen në një hotel në anën tjetër të rrethrrotullimit. Pranë tij në video shihen 3 burra në trotuar, të tmerruar prej të shtënave. Ciflat e betonit dhe xhamit të hotelit u bien afër. Një mrekulli i ka shpëtuar prej plumbave.

Pas kësaj breshërie të parë, makina Benz me viktimat lëviz edhe për disa metra të tjera në krahun e kundërt të rrethrrotullimit, për të ndaluar thuajse në korsinë tjetër. Tre atentatorët kthehen në makinën Toyota me synimin për t’u larguar, por njëri prej tyre, i pabindur se puna ishte kryer siç duhet, niset sërish drejt makinës Benz.

Në gjysmë të rrugës tenton disa herë të qëllojë, por pa sukses, pasi i bllokohet arma. Ai kthehet mbrapsht ndërsa bashkëpunëtori i tij vrapon dhe të dy këmbejnë armët fiks poshtë statujës së Nënë Terezës.

Pas kësaj “skeptiku” afrohet me kujdes sërish te Benzi dhe shihet tek ndalon për të vëzhguar nga pas nëse brenda ka shenja jete. Pastaj afrohet te xhami i pasagjerit, qëllon disa herë për t’u siguruar se Gilmando Dani është ekzekutuar. Atentatori i dytë nga distanca qëllon edhe gomat e makinës.

Në videon e publikuar nga DITA shikohet se papritur sheshi që pak sekonda më parë ishte plot, një moment është krejtësisht i boshatisur. Të dy atentatorët, gjejnë kohën të mbledhin edhe disa sende që u kanë rënë mbi rrethrrotullim dhe nisen me vrap drejt makinës Toyota, e cila del me shpejtësi nga rrethrrotullimi.

Grupi i vrasësve ishte nisur nga Nikla me makinën “Toyota” përmes rrugës së re te Ura e Tubit, e cila lidh fshatrat e Fushë Krujës me Rinasin. E njëjta u përdor edhe në kthim.

Por një detaj ngre dyshime për hetuesit e Policisë së Tiranës. Në kohën që makina ka kaluar drejt aeroportit, por dhe në arratisje, zona pranë itinerarit të rrugës ka qenë pa energji elektrike.

Hetuesit dyshojnë që autorët të kenë bashkëpunëtorë në OSHEE, pasi kamerat e sigurisë, kishin dalë jashtë loje, pa mundur të filmojnë lëvizjen e makinës që më vonë u gjet e djegur, në një rrugicë të ngushtë në fshatin Halil.

j.l./ dita