Përleshjet kanë shpërthyer midis trupave azerbajxhan dhe armen, në një rifillim të armiqësive dekada të vjetra të lidhura me territorin e diskutueshëm të Nagorno-Karabakut.
Sipas Guardian, Kryeministri armen, Nikol Pashinyan, ka telefonuar presidentin rus Vladimir Putin, presidentin francez Emmanuel Macron dhe sekretarin e shtetit të Shteteve të Bashkuara, Antony Blinken, për të diskutuar situatën.
Azerbajxhani, i cili rivendosi kontrollin e plotë mbi territorin në një konflikt gjashtëjavor në vitin 2020, pranoi viktima midis forcave të tij. Armenia nuk përmendi humbje, por tha se përleshjet vazhduan gjatë natës.
Qeveria e Jerevanit tha se do të përdorte një marrëveshje bashkëpunimi me Rusinë dhe do t’i apelonte një blloku sigurie të udhëhequr nga Rusia, Organizatës së Traktatit të Sigurisë Kolektive, si dhe Këshillit të Sigurimit të OKB-së.
Marrëdhëniet midis dy ish-republikave sovjetike janë tensionuar që nga viti 1991 për enklavën e diskutueshme të Nagorno-Karabakut. Konflikti për kontrollin e saj u përshkallëzua përsëri në vjeshtën e vitit 2020, kur shpërtheu një luftë 44-ditore, gjatë së cilës forcat azere morën kontrollin e disa sektorëve.
Lufta përfundoi falë një marrëveshje paqeje të ndërmjetësuar nga Rusia, por Baku dhe Jerevani herë pas here kanë akuzuar njëri-tjetrin për shkelje të armëpushimit përgjatë kufirit. Megjithatë, rajoni është shpesh i tensionuar, më së fundi me atë që ndodhi në fillim të gushtit kur Azerbajxhani akuzoi Armeninë për bombardimin e rajonit të Nagorno-Karabakh.
j.l./ dita
