Protestuesit kaluan natën në shesh para Kryeministrisë: Je i rrethuar, nuk ke ku të shpëtosh

Pas protestës së 21-të mbrëmjen e shkuar, një grup protestuesish kanë vendosur ta kalojnë natën në shesh, duke krijuar një skenë të re në dinamikën e revoltave të fundit.

Kjo është hera e parë që nga nisja e valës së protestave që qytetarët zgjedhin të qëndrojnë përgjatë gjithë natës përpara institucionit të Kryeministrisë.

Me një vendosmëri që duket se po ashpërson qëndrimet, ata kanë deklaruar se nuk do të shpërndahen deri në plotësimin e plotë të kërkesave të tyre. Qytetarët kanë thirrut njëzëri, “Je i rrethuar, nuk ke ku të shpëtosh”.

Forcat e Policisë kanë ndërhyrë përballë protestuesve që kaluan natën para Kryeministrisë.

Mësohet se, efektivët kanë kërkuar lirimin e menjëhershëm të rrugës, duke paralajmëruar qytetarët se nëse nuk zhbllokohet qarkullimi, autoritetet do të ndërmarrin masa.

“Nëse rruga nuk lirohet, policia do të marrë masa”, njoftuan autoritetet protesuesit..

Ultimatumi i Policisë është përballur me një qëndresë të vendosur nga ana e protestuesve, ku turma i është përgjigjur kërkesës së autoriteteve me thirrje në kor, duke kërkuar me forcë dorëheqjen e Kryeministrit Rama.

“Rama, jep dorëheqjen”, ka vijuar turma qëndrimin e tyre përpara Kryeministrisë.

j.l./ dita