Presidenti rus Vladimir Putin duket se ka ndryshuar taktikë. Për tre vitet e fundit, udhëheqësi rus është parë rrallë në publik.
Ai qëndroi pothuajse në izolim gjatë pandemisë dhe kur u publikuan fotot e tij, ai zakonisht shihej i ulur në një tavolinë të madhe, larg nga kushdo përreth. Por pasi u përball me sfidën më të madhe ndonjëherë ndaj autoritetit të tij këtë fundjavë, Putin është kthyer në sytë e publikut.
Kremlini tani po bën përpjekje të mëdha për të rikthyer autoritetin e Putinit, me takime dhe ngjarje publike të dizajnuara për të treguar unitetin dhe solidaritetin e shtetit dhe ushtrisë nën udhëheqjen e tij.
Putin bëri disa paraqitje surprizë në publik që nga ngjarjet e jashtëzakonshme të fundjavës së kaluar, duke përfshirë një udhëtim në Dagestan të mërkurën.
Udhëheqësi rus u takua nga mbështetës të emocionuar në rrugët e qytetit të Derbentit, sipas videos së postuar nga Kremlini, vetëm disa ditë pas një kryengritjeje jetëshkurtër të udhëhequr nga shefi i Wagner, Yevgeny Prigozhin.
“Nuk ka asnjë person në Dagestan që nuk do të mbështeste vendimet e udhëheqjes së Federatës Ruse, të cilat u miratuan më 24 qershor të këtij viti,” tha kreu i Dagestanit Sergej Melikov në një takim pune me Putin gjatë vizitës së tij.
“Nuk kisha dyshime për reagimet në Dagestan dhe në të gjithë vendin,” u përgjigj Putin.
Një video e publikuar nga Kremlini të hënën tregoi Putinin duke iu drejtuar një auditori të Forumit Ndërkombëtar Rinor Industrial, i cili po mbante një takim në Tula.
Fjalimi, i cili nuk përfshiu rebelimin ishte paraqitja e parë e Putinit pasi Prigozhin ktheu trupat e tij të shtunën. Kremlini nuk përmendi se kur dhe ku u xhirua videoja. Putin u pa gjithashtu duke iu drejtuar forcave të sigurisë në Kremlin, duke lavdëruar ato agjenci që ishin të përfshira në shtypjen e rebelimit.
“Në një situatë të vështirë, ju vepruat qartë, në mënyrë të mirë-koordinuar, me vepra vërtetuat besnikërinë tuaj ndaj popullit të Rusisë dhe ndaj betimit ushtarak, treguat përgjegjësi për fatin e Atdheut dhe të ardhmen e tij”, tha ai.
p.k\dita
