Qokë politikës për 3-4 emra apo ndryshim për mijëra fukarenj në qeli? Çfarë synon nisma e Gjykatës së Lartë për paraburgimin

E PËRDITËSUAR – Kolegjet e Bashkuara të Gjykatës së Lartë janë mbledhur dje për të shqyrtuar ndryshimin e praktikës lidhur me paraburgimet. Veçanërisht, synohet shmangia e arrestit në fazë hetimore, duke u dhënë përparësi masave alternative më të buta për kufizimin e lirisë personale.

Me këtë vendim pritet të përfitojnë zyrtarë që janë nën hetim të cilët nuk “konsiderohen automatikisht të rrezikshëm”. Sipas Gjykatës së Lartë, në dhënien e masave, trupi gjykues duhet të analizojë opsionet alternative.

Parashtrimi i çështjes u bë nga kryetari i Gjykatës së Lartë, Sokol Sadushi.

Ky hap shënon ushtrimin për herë të parë të kompetencës së Kryetarit të Gjykatës së Lartë, sipas nenit 438 të Kodit të Procedurës Penale, për të kërkuar ndryshimin e një praktike të njësuar të Kolegjeve të Bashkuara.

Ky vendim pritet të ketë një ndikim të rëndësishëm në praktikën gjyqësore në në Shqipëri. Ndryshimi ishte paralajmëruar më herët nga mazhoranca pas arrestimeve për korrupsion.

DOKUMENTI (Kliko)

Më poshtë disa mendime të juristëve mbi arsyet e kësaj nisme.

Avokati Edmond Petraj është shprehur në emisionin ‘Frontline’ me gazetaren Marsela Karapanço në Report Tv se pavarësisht vendimit që do të merrnin Kolegjet e Bashkuara të Gjykatës së Lartë, ai kishte bindjen se situata me paraburgimet nuk do të ndryshonte.

Kjo pasi sipas tij, Gjykata nuk ka marrë për bazë shumë vendime të Kolegjeve të Bashkuara.

“Kanë qenë këta ish-prokurorë dhe ish-gjyqtarë që e kanë masakruar sistemin. Ky vendim nuk është se do ndryshojë diçka. Sepse ka edhe vendime të tjera të Kolegjeve të Bashkuara, që Gjykata nuk i merr për bazë. Por ky vendim ndoshta do nisë të ngrejë pak përgjegjësinë që do të kenë prokurorët dhe gjyqtarët, për atë dosje apo masë sigurie që do i vejë përballë në tavolinë”, tha Petraj.

Për avokatin Leonard Karaj, vendimi i Gjykatës së Lartë për të riparë praktikën e paraburgimeve, ishte një ‘qokë’ për politikën, veçanërisht në shërbim të kryeministrit Edi Rama dhe disa vartësve të tij.

Karaj tha se në Shqipëri ka një numër të lartë të paraburgosurish, por theksoi se vendimi Kolegjeve të Bashkuara nuk do i shërbente qytetarëve të thjeshtë, por politikanëve.

“Jam totalisht kundër kësaj ideje të Gjykatës së Lartë. Sadushi është duke i bërë qokën Edi Ramës. Pra këtu çdo gjë është politike. Kemi një gjykatë që është bërë notere e prokurorëve. Kur gjykatësve u’a ankimojnë vendimet prokurorët, ata vihen në siklet të paparë. Ne nuk çalojmë te ligji. E gjithë kjo bëhet për 3-4 emra. Nuk bëhet për ata 2500 vetë që janë në paraburgim”, tha avokati Karaj.

Ndërsa për ish-prokurorin Ervin Karanxha, qelitë e paraburgimeve janë të mbushur me njerëz fukarenj që po shkatërrojnë familjet e tyre me qëndrimin atje.

“Duhen edhe ndryshime legjislative. Sepse kjo është dështim i Reformës në Drejtësi. Sepse u bë qëllimisht që të bëheshin gjyqet sa më shpejtë, paraburgimet të jenë të shkurtra. Pra doli mashtrim. Mendimi im personal është se vendimi është pozitiv. Unë e shoh nga ana e popullit, që të vendosen kritere strikte. Burgjet janë mbushur me fukarenj, me të mbaruar. Kapen ata që rrahin gruan, vjen gruaja dhe thotë ‘ore ngela pa bukë në shtëpi’ dhe këta i thonë ‘tani rri në burg’. E shkatërrojnë si familje. Gjykata nuk merr parasysh rrethanat lehtësuese”, tha ish-prokurori Karanxha.

j.l./ dita