Ashtu si edhe në merkaton e kaluar verore, sërish Kylian Mbappe do ta shndërrojë edhe këtë verë të ardhmen e tij në një telenovelë të vërtetë. Letra që sulmuesi francez i dërgoi drejtuesve të Paris Saint-Germain ku i njoftoi se nuk do të rinovojë kontratën që i skadon në fundin e sezonit 2024, ndezi merkaton me parizienët që do të tentojnë ta shesin këtë verë për të mos e humbur më pas me parametër zero.
Arabët e PSG kërkojnë të paktën 200 milionë euro, teksa për momentin pretendentët kryesorë për shërbimet e tij, Real Madrid nuk po lëvizin në mënyrë konkrete. Nga ana tjetër, Liverpool do të tentojë të përfitojë dhe një agjent i FIFA-s konfirmoi për Marca-n se ‘The Reds’ janë të gatshëm të shpenzojnë deri në 300 milionë dollarë për të transferuar në Anfield Road 24-vjeçarin.
Sipas agjentit të FIFA-s, pritet që në javën e ardhshme të ketë të reja në këtë drejtim me Liverpool që e ka marrë seriozisht çështjen “Mbappe” teksa edhe më herët anglezët kanë shfaqur hapur interesin për sulmuesin. Mbetet për t’u parë tashmë nëse kjo lëvizje do të shtyjë edhe Real Madridin për t’u kundërpërgjigjur pasi në kryeqytetin spanjoll nuk është një sekret dobësia për Mbappe.
