Tregjet e aksioneve në mbarë botën përjetuan një rritje të ndjeshme këtë mëngjes, të nxitura nga shpresat për një lehtësim të tensioneve tregtare midis Shteteve të Bashkuara dhe Kinës. Pas një dite pozitive në Wall Street, optimizmi u përhap edhe në bursat evropiane dhe aziatike.
Në Evropë, indeksi STOXX 600 i aksioneve kryesore u rrit me 1.8% në orët e para të mëngjesit, duke shënuar ditën e dytë radhazi me fitime. Ndërkohë, indeksi FTSE 100 në Londër u ngjit me 1.02%, duke arritur në 8,415 pikë. DAX në Frankfurt regjistroi një rritje prej 2.15%, në 21,750 pikë, ndërsa CAC 40 në Paris u rrit me 1.43%, në 7,430 pikë.
Rritje u regjistrua edhe në tregjet aziatike, ku indeksi MSCI i rajonit Azi-Paqësor u forcua me 0.7%. Nikkei i Japonisë u rrit me 1.9%, ndërsa indekset në Shangai, Australi, Korenë e Jugut dhe Hong Kong shënuan rritje nga 0.1% deri në 2.4%.
Sipas analistit financiar Ryan Detrick nga grupi Carson: “Lehtësimi i acarimit SHBA-Kinë, falë komenteve të Bessent, e ka shtyrë tregun më lart.”
Ndikim të rëndësishëm pati edhe rritja e fortë e indeksit Doë Jones me 2.7%, e ndjekur nga S&P 500 me 2.5% dhe Nasdaq me 2.7%, të cilat kompensuan humbjet e një dite më parë.
Presidenti amerikan Donald Trump kishte kritikuar më herët kryetarin e Rezervës Federale Jerome Poëell, duke shkaktuar lëkundje në tregje. Megjithatë, Trump sqaroi se nuk ka në plan ta shkarkojë Poëell-in, por dëshiron norma më të ulëta interesi për të nxitur rritjen ekonomike.
Gjithashtu, Sekretari i Thesarit Scott Bessent dha sinjale pozitive mbi marrëdhëniet tregtare me Pekinin:
“Besoj se tensionet tregtare me Kinën do të zbuten, edhe pse negociatat ende nuk kanë filluar dhe priten të jenë të ngadalta,” deklaroi ai.
Në një prononcim të mëvonshëm, Presidenti Trump theksoi se është i gatshëm për një marrëveshje me Kinën dhe se tarifat “nuk do të jenë as 145 për qind, por as 0 për qind.”
