Janë gjetur disa lloje polimeresh dhe gome në ujin e reve që rrethojnë malin Fuji, malin më të madh të Japonisë dhe malin Ōyama. Studimi i botuar në revistën Environmental Chemical Letters, i bashkohet një numri në rritje të provave që tregojnë se ndotja plastike ka infiltruar shumicën e ekosistemeve në Tokë.
Fragmente plastike më të vogla se 5 mm (rreth madhësisë së farës së susamit) janë gjetur tashmë në skajet më të largëta të planetit dhe në pjesët më intime të trupit të njeriut, duke përfshirë gjakun, mushkëritë dhe placentën e grave shtatzëna.
Ja pse zbulimi nuk është vetëm i panatyrshëm, por edhe shqetësues për klimën tonë.
Uji i reve u mblodh në majat e dy maleve japoneze në lartësitë midis 1300-3776 metra. Shkencëtarët përdorën teknika të avancuara dhe gjetën nëntë lloje të ndryshme polimeresh dhe një lloj gome në mikroplastikën e ajrit.
Retë përmbanin deri në 14 copa plastike për litër ujë të cilat varionin në madhësi nga 7 deri në 95 mikrometra; pak mbi gjerësinë mesatare të një floku të njeriut.
Plastika është hidrofobike, por bëhet hidrofile (që do të thotë ujëdashëse) pas ekspozimit të zgjatur ndaj dritës ultravjollcë, shpjegojnë autorët.
Bollëku i këtyre polimereve në disa mostra sugjeron se ato mund të kenë vepruar si “bërthamë kondensimi” të akullit dhe ujit të reve. Bërthamat e kondensimit janë grimca të vogla mbi të cilat avulli i ujit kondensohet në atmosferë, që do të thotë se ato janë thelbësore për formimin e reve.
“Kjo nënkupton që mikroplastika mund të jetë bërë një komponent thelbësor i reve, duke ndotur pothuajse gjithçka që hamë dhe pimë nëpërmjet reshjeve, sipas një deklarate në lidhje me studimin nga Universiteti Waseda.
