Ditën e sotme, në Prishtinë të do mbahet “Samiti i Ballkanit Perëndimor 2022”, organizim i The Economist, në bashkëpunim me zyrën e kryeministrit të Kosovës, Albin Kurtit.
Lajmin e ka konfirmuar zyra për shtyp e kryeministrit e cila njoftoi se temat e diskutimit do të jenë pushtimi rus i Ukrainës, mungesa e energjisë dhe mallrave dhe rritja e çmimeve po e çojnë botën drejt një krize të shumanshme.
Në këtë samit do të marrin pjesë krerët e shteteve nga rajoni, liderët e biznesit dhe financave dhe akademikët të cilët do të ndajnë njohuritë e tyre mbi strategjitë e reja për të trajtuar krizën aktuale dhe për të rritur stabilitetin dhe bashkëpunimin në rajon dhe më gjerë.
“Rajoni i Ballkanit Perëndimor ka një rol unik për të luajtur kundër këtij mjedisi. Ideja se pa Ballkanin Perëndimor, Evropa nuk mund të jetë vërtet e bashkuar, gjithëpërfshirëse dhe politikisht efektive po fiton terren. Rajoni ka një rol kritik për të luajtur në nxitjen e paqes, bashkëpunimit dhe unitetit përmes diversitetit për Evropën. Megjithatë, për të përfituar nga ky rol, vendet e rajonit do të duhet të zgjidhin konfliktet rajonale dhe të lehtësojnë reformat që zvogëlojnë hendekun me pjesën më të zhvilluar të Evropë”, thuhet në njoftim për media të këtij samiti.
Sipas agjendës së publikuar nga zyra e kryeministrisë, Samiti nis në orën 9:00 ku do të flasë kryeministri i Kosovës, Albin Kurti, ministrat Donika Gërvalla, Artane Rizvanolli dhe Hekuran Murati.
Më pas fjalën do ta mbajnë edhe ish-kryeministri i Greqisë, George Papandreou dhe ish-presidenti i Parlamentit Evropian Martin Schulz. Një fjalim do ta mbajë edhe ambasadori i Shteteve të Bashkuara të Amerikës, Jeffrey Hovenier, por edhe Sir Stuart Peach, i dërguari special i Mbretërisë së Bashkuar për Ballkanin Perëndimor.
j.l./ dita
