Sekretari i Përgjithshëm i NATO-s, Jens Stoltenberg deklaroi në konferencën e përbashkët me presidenten e Kosovës Vjosa Osmani se për aleancën veri-atlantike është thelbësore që të shmanget përshkallëzimi i mëtejmë në veri të Kosovës.
“U bëj thirrje të gjitha palëve që t’i larohen retorikës nxitëse dhe të përmbahen, në linjë me zotimet e tyre”, tha ai.
Stoltenberg u shpreh se dhuna ndaj pjesëtarëve të misionit të NATO-s në Kosovë më muaj më parë, ka qenë e papranueshme. Sipas tij, stabiliteti i rajonit varet nga të gjitha palët. Nga ana tjetër, Stoltenberg e ka mirëpritur vendimin e autoriteteve të Kosovës për zvogëlim të prezencës policore në veri dhe planet për mbajtje të zgjedhjeve të reja në atë pjesë të vendit.
“KFOR-i vazhdon ta vëzhgojë situatën nga afër dhe jemi të gatshëm të veprojmë nëse kërkohet për ta përmbushur mandatin e Kombeve të Bashkuara, për të garantuar ambient të sigurt dhe liri të lëvizjes për të gjitha komunitetet në Kosovë”, përfundoi Stoltenberg.
