Presidenti i SHBA-ve Donald Trump thotë se homologu i tij ukrainas, Volodymyr Zelensky është i gatshëm t’i dorëzojë Krimenë Rusisë si pjesë e një marrëveshjeje paqeje, pavarësisht refuzimeve të mëparshme të Kievit për një propozim të tillë. I pyetur nëse mendon se Zelensky është gati të dorëzojë kontrollin e gadishullit të tij jugor, i cili u aneksua ilegalisht nga Rusia në vitin 2014, Trump u përgjigj: “Unë mendoj se po”.
Ai i bëri komentet para gazetarëve pasi u kthye nga Vatikani, ku zhvilloi një takim të shkurtër me Zelenskyn përpara funeralit të Papa Françeskut. Sipas presidentit amerikan, takimi “shkoi mirë”, ndërsa u fol “shkurt edhe për Krimenë”. Sipas Trump, Zelensky dukej më i qetë, duke kujtuar kështu tsakimin e tensionuar mes tyre në Zyrën Ovale.
Ukraina ka refuzuar në mënyrë të përsëritur të bëjë ndonjë lëshim territorial, duke theksuar se çështjet në lidhje me tokën duhet të diskutohen vetëm pasi të arrihet një armëpushim. Ndërkohë Zelensky dhe as presidenti rus Vladimir Putin nuk u janë përgjigjur publikisht komenteve të fundit të Trump.
Të dielën, ministri gjerman i Mbrojtjes Boris Pistorius paralajmëroi Ukrainën që të mos pajtohet me një marrëveshje që përfshin lëshime gjithëpërfshirëse territoriale në këmbim të një armëpushimi. Ai i tha transmetuesit publik gjerman ARD se Kievi “nuk duhet të shkojë aq larg sa propozimi i fundit i presidentit amerikan”, për të cilin ai tha se do të përbënte një “kapitullim”.
Trump tha javën e kaluar se për “shumicën e pikave kryesore të marrëveshjes është rënë dakord”. Raportet tregojnë se Ukrainës mund t’i kërkohet të heqë dorë nga pjesë të mëdha të tokës së kapur nga Rusia, përfshirë Krimenë.
j.l./ dita
Krimea ka kohe qe te ka ikur ty o lum djali po shiko negocio per teritore te tjera