Bashkimi Evropian thotë se mbetet i përkushtuar për të arritur një marrëveshje tregtare me Shtetet e Bashkuara të Amerikës, duke theksuar se dialogu duhet të udhëhiqet nga respekti i ndërsjellë dhe jo nga kërcënimet. Shefi i Tregtisë së BE-së, Maros Sefcovic, tha se BE-ja është plotësisht e angazhuar për të siguruar një marrëveshje që funksionon për të dyja palët, duke nënvizuar rëndësinë e bashkëpunimit të ndërsjellë.
“Tregtia BE-SHBA është e pakrahasueshme dhe duhet të udhëhiqet nga respekti, jo nga kërcënimet. Ne jemi të gatshëm të mbrojmë interesat tona”, tha ai.
Trump, përmes një postimi në platformën e tij Truth Social, kritikoi negociatat aktuale si joefektive, duke paralajmëruar rritjen e tarifave më 1 qershor. Ai tha se nuk kërkon më një marrëveshje, por nuk përjashtoi mundësinë e një vonese nëse ndodh një investim i madh evropian në SHBA.
Bashkimi Evropian është një nga partnerët më të mëdhenj tregtarë të SHBA-së, me mbi 600 miliardë dollarë në mallra të eksportuara drejt Amerikës vitin e kaluar dhe me importe prej rreth 370 miliardë dollarësh, sipas të dhënave të qeverisë amerikane.
j.l./ dita
