Megjithë masat e rrepta të ndërmarra nga qeveria britanike për të frenuar emigrimin illegal drejt Britanisë së Madhe, duket se trafikantët shqiptarë jo vetëm nuk janë ndalur por kanë gjetur dhe metoda të reja.
Kështu shkruan britanikja “The Sun”, duke iu referuar burimeve të brendshme.
The Sun shkruan se bandat përshtaten dhe kanë gjetur mënyra të reja për të mposhtur zyrtarët e kufirit dhe për të fshehur emigrantët, zbuloi burimi i brendshëm.
Kjo vjen pasi kryeministri Rishi Sunak u zotua të dëbojë një numër të shtuar të emigrantëve të paligjshëm shqiptarë.
“Kontrabandistët janë gjithmonë përpara qeverisë. Ata do të ndryshojnë dhe do të përshtaten, por do të vazhdojnë të marrin njerëzit brenda” tha eksperti.
Duke identifikuar dy rrugët kryesore të përdorura nga bandat, ai shpjegoi se shefat e bandës rekrutojnë shoferë të korruptuar kamionësh në Belgjikë dhe Francë.
Më pas i japin ryshfet për të transportuar njerëz në ngarkesën e tyre, fjalë për fjalë në pjesën e pasme të kamionit. Kur kamioni mbërrin në MB, të paligjshmit i lëshojnë në parkingje. Më pas vijnë të afërmit dhe i marrin.
Burimi tha se bandat paguajnë rreth 18,000 £ për person dhe rruga e dytë përfshin përdorimin e dokumentacionit të rremë.
“Bandat kanë shqiptarë në BE me aftësinë për të krijuar pasaporta false, plotësisht biometrike. Ata mund të krijojnë edhe leje drejtimi false. Bandat paguajnë nga 2 mijë deri në 3 mijë paund për pasaporta false. Pasi të keni një nga këto, thjesht fluturoni për në Londër si turist dhe jeni brenda,” tha ai.
Ai e përshkroi tregtinë si shumë fitimprurëse, duke shtuar: Është një biznes shumëmilionësh.
Eksperti tha se komentet e fundit të Sunak për deportimin e shqiptarëve ishin raportuar gjerësisht në vend.
“Në Shqipëri ndjesia është se po na veçojnë padrejtësisht. Ne e dimë se problemi i trafikimit të njerëzve në Mbretërinë e Bashkuar përfshin rreth 11 vende të tjera, si Iraku dhe Afganistani. Nuk janë vetëm shqiptarët që mbërrijnë ilegalisht në Britaninë e Madhe” tha ai.
Burimi tha gjithashtu për The Sun se kontrabandistët e njerëzve vepronin veçmas nga bandat shqiptare që kanë marrë kontrollin e tregtisë së drogës në Mbretërinë e Bashkuar gjatë 20 viteve të fundit.
m.b./dita
