Presidenti amerikan, Donald Trump, njoftoi të premten se do të takohet me presidentin rus, Vladimir Putin, më 15 gusht në Alaskë për të diskutuar mundësitë për përfundimin e luftës në Ukrainë, një hap që ai e quajti të mundshëm pas javësh zhgënjimi për mungesën e përparimit në bisedimet për armëpushim.
Në një deklaratë për mediat nga Shtëpia e Bardhë, Trump konfirmoi se ka arritur marrëveshje për takimin, por refuzoi të jepte detaje të sakta për vendin dhe orën, duke shtuar se informacionet e plota do të publikohen së shpejti. Më vonë, në rrjetet sociale, ai bëri të ditur se takimi i shumëpritur do të zhvillohet në Alaskë, duke theksuar se detajet e tjera do të ndahen më vonë.
Këshilltari për politikë të jashtme i presidentit rus, Yury Ushakov, konfirmoi gjithashtu takimin, duke e quajtur atë një zhvillim logjik për dy vende që ndajnë kufi dhe që kanë interesa të ngjashme për të diskutuar në këtë samit.
“Rusia dhe Shtetet e Bashkuara janë fqinj të afërt që ndajnë kufi”, tha Ushakov, sipas agjencisë TASS. “Një samit kaq i rëndësishëm dhe i shumëpritur është mjaft logjik të mbahet në Alaskë.”
Në këtë kontekst, Trump theksoi gjithashtu se takimi mund të zhvillohet para çdo takimi të mundshëm trepalësh që mund të përfshinte edhe presidentin e Ukrainës, Volodymyr Zelensky.
j.l./ dita
