Administrata Trump njoftoi të hënën se po planifikon të anulojë vizat e biznesit dhe turizmit të 200 mijë shtetasve të huaj, të cilët kanë aplikuar ose po kërkojnë aktualisht azil në Shtetet e Bashkuara.
Nëse masa nuk kundërshtohet me sukses ose nuk rishikohet, ajo do të përbënte anulimin më të madh të njëhershëm të vizave në historinë e SHBA-së.
“Po bashkëpunojmë me Departamentin e Sigurisë Kombëtare për të identifikuar dhe anuluar vizat joemigruese të shtetasve të huaj që kanë ardhur në Shtetet e Bashkuara duke pretenduar se janë vizitorë afatshkurtër, por më pas kanë paraqitur kërkesë për azil për të qëndruar këtu përgjithmonë”, tha zëdhënësi i Departamentit të Shtetit, Tommy Pigott.
Ai nuk komentoi mbi numrin e saktë të vizave që pritet të anulohen, duke deklaruar se “numri i tyre mbetet dinamik dhe procesi do të kryhet në mënyrë të vazhdueshme”.
Sipas dokumenteve të siguruara nga agjencia e lajmeve Associated Press dhe dy zyrtarëve amerikanë, të cilët folën në kushte anonimiteti, Departamenti i Shtetit pritet që në javët e ardhshme të njoftojë anulimin e vizave B1 dhe B2 të lëshuara gjatë periudhës 2016-2026 për personat që kanë kërkuar ose po kërkojnë aktualisht azil.
Vizat B1 zakonisht lëshohen për udhëtime biznesi, ndërsa vizat B2 për turizëm, vizita familjare dhe kujdes mjekësor. Aplikantëve aktualë për të dyja kategoritë u kërkohet të konfirmojnë se nuk synojnë të kërkojnë azil në SHBA dhe të paraqesin prova se kanë ndërmend të kthehen në vendet e tyre të origjinës.
Zyrtarët sqaruan se anulimi i vizës nuk do të çonte menjëherë në dëbimin e personit, por ata që kanë çështje azili ende në proces do të humbnin statusin e tyre si udhëtarë për biznes ose turizëm.
Masa është më e fundit në kuadër të goditjes më të gjerë të administratës Trump ndaj emigracionit, e cila është intensifikuar që kur presidenti Donald Trump u rikthye në detyrë për mandatin e tij të dytë.
Administrata ka ashpërsuar tashmë kufizimet për aplikantët për viza, duke u kërkuar atyre të paraqesin historikun e llogarive të tyre në rrjetet sociale, duke vendosur garanci financiare të kushtueshme përpara përpunimit të vizave, si edhe duke vendosur ndalime të plota të vizave për shtetasit e disa vendeve.
Të premten, një gjykatëse rrëzoi një politikë të administratës Trump, të zbatuar më herët këtë vit, e cila kishte pezulluar lëshimin e vizave të emigracionit për shtetasit e 75 vendeve.
Gjyqtarja e Gjykatës së Qarkut të SHBA-së, Jeannette Vargas, e emëruar nga ish-presidenti Joe Biden, deklaroi se politika ishte “në kundërshtim me ligjin dhe tejkalonte kompetencat e parashikuara nga ligji”, duke argumentuar se ajo cenonte kërkesën e Kongresit që zyrtarët konsullorë të jenë në vijën e parë të vendimmarrjes për vizat.
j.l./ dita
