Presidenti amerikan Donald Trump ka njoftuar një marrëveshje për armëpushim të plotë mes Izraelit dhe Iranit, e cila pritet të hyjë në fuqi brenda pak orësh.
Në një postim në rrjetet sociale të hënën në mbrëmje, Trump deklaroi se është arritur dakordësia për një “Armëpushim të Plotë dhe të Gjithanshëm” midis dy vendeve, i cili do të nisë rreth 6 orë pas njoftimit dhe do të zgjasë për një total prej 24 orësh, në faza të veçanta.
“Është rënë plotësisht dakord mes Izraelit dhe Iranit që të ketë një ARMËPUSHIM TË PLOTË për 12 orë (rreth 6 orë nga tani, pasi të jenë përmbyllur misionet përfundimtare). Pas kësaj, lufta do të konsiderohet e përfunduar,” shkroi Trump.
“ Izraeli dhe Irani erdhën tek unë, pothuajse njëkohësisht, dhe thanë: “PAQE!” E dija që koha ishte TANI. Bota dhe Lindja e Mesme janë FITUESIT e vërtetë! Të dy kombet do të shohin DASHURI, PAQE DHE PROGRES të jashtëzakonshëm në të ardhmen e tyre. Ata kanë kaq shumë për të fituar, por edhe kaq shumë për të humbur, nëse devijojnë nga rruga e DREJTËSISË DHE TË VËRTETËS. E ardhmja për Izraelin dhe Iranin është e pakufizuar dhe e mbushur me REFUGJATË të mëdhenj. ZOTI JU BEKOFTE TË DY! ”, komentoi Presidenti Amerikan në rrjetet sociale, duke nënkuptuar se Teherani do t’i ndalte sulmet i pari, i ndjekur nga Izraeli.
Qeveria e Izraelit ka konfirmuar se është pajtuar me propozimin e presidentit amerikan Donald Trump për armëpushim. Zyra e kryeministrit izraelit, Benjamin Netanyahut, thotë se Izraeli do t’i përgjigjet me forcë çdo shkeljeje të armëpushimit me Iranin.
Si do të funksionojë armëpushimi?
Irani do të nisë armëpushimin për 12 orët e para.
Izraeli do të ndalojë operacionet për 12 orët pasuese.
Pas përfundimit të 24 orëve, do të shpallet fundi zyrtar i Luftës 12-ditore.
Trump shtoi se gjatë periudhës së armëpushimit, të dyja palët do të qëndrojnë “paqësore dhe të qeta”.
Menjëherë pas njoftimit, Zëvendëspresidenti i SHBA-së, JD Vance, komentoi për Fox News se marrëveshja ishte rezultat i përpjekjeve të fundit të administratës Trump.
“Po punonim për këtë deri në momentin që lashë Shtëpinë e Bardhë. Është lajm i mirë që presidenti e çoi deri në fund,” tha ai.
Deri tani nuk ka pasur reagime zyrtare nga autoritetet izraelite apo iraniane për të konfirmuar marrëveshjen. Mbetet për tu parë në orët në vijim nëse njoftimi i presidentit Trump do të reflektohet në realitetin e terrenit.
j.l./ dita
