Hekuran Murtaj, 33-vjeçari i cili u vetëplagos me kallashnikov dhe gënjeu hetuesit, iu është gjetur një parcelë me drogë.
I riu, banues në fshatin Stjar të Delvinës, u arrestua disa ditë më parë nga policia e Sarandës për “mbajtje pa leje të armëve luftarake dhe municioneve”.
Hekuran Murtaj shkoi i plagosur në spitalin e Sarandës më 20 shtator, ku deklaroi se i kishte plasur një fishek që e kishte gjetur në fushë dhe e kishte goditur me gur.
Por pas hetimeve të Policisë së Sarandës zbuluan se Hekuran Murtaj ishte vetëplagosur në Livadhja, në Bashkinë Finiq, pasi ishte shkrepur gabimisht kallashnikovi që mbante pa leje.
Pas plagosjes, vëllai i 33-vjeçarit dhe një shok i tij kishin fshehur armën për të mos u zbuluar nga policia.
Megjithatë, gjatë kontrollit të një celulari, policia u përball edhe me një tjetër vepër penale.
Siç zbulohet nga aktet gjyqësore në vendimin për caktimin e masës së sigurisë: “Gjatë këqyrjes që i bëhet fotove dhe videove të regjistruara gjendet edhe një video e regjistruar në datën 2 gusht 2023, 17 sekonda e cila tregon disa bimë të dyshuara narkotike “cannabis sativa” në mes të disa shkurreve dhe një video tjetër 23 sekonda, e cila tregon të njëjta pamje. Nga ana e policisë gjyqësore janë ushtruar kontrolle në zonat dhe fushat midis fshatit Vagalat e Gravë me dron dhe u gjet vendi ku ishin kultivuar bimët e dyshuara narkotike, të cilat ndodheshin në afër lumit Pavilo në anë të fushave me misër. Në këtë territor ku u zbuluan bimët narkotike u gjetën dhe u sekuestruan me cilësi e provës materiale një bidon plastik 0.5 L me mbishkrimin “ZAGORI”, dy qese plastmasi me ngjyrë të bardhë, si dhe disa rroba të cilat u dërguan për ekzaminim laboratorik”.
Megjithatë, Prokuroria duket se ende nuk ka ngritur akuzën e “kultivimit të bimëve narkotike” ndaj Murtajt, në pritje të ekspertizës nga Tirana.
Ai ndërkohë është lënë në masën “Arrest në burg” nga Gjykata për veprën penale “mbajtje pa leje të armëve luftarake dhe municionit”, ndërkohë që shoku i tij Luan Ramaj është në masën “Arrest në shtëpi” ndërsa i vëllai Mullez Murtaj është lënë i lirë në masën “detyrim paraqitje”.
j.l./ dita
