Aktorja Samantha Weinstein, e cila u bë e famshme për rolin e saj në xhirimin e filmit ‘Carrie’, ka vdekur në moshën 28-vjeçare pas një lufte të gjatë kundër kancerit të vezoreve. Artistja e cila ishte shumë e re në industrinë e filmit, vdiq më 14 maj, siç raportojnë të afërmit e saj përmes një publikimi në rrjetet sociale, por lajmi u publikua vetëm së fundmi nga mediat.
Aktorja e re, e cila ka huazuar zërin edhe në serialet për fëmijë si ‘Babar dhe aventurat e Badou’, ‘The ZhuZhus’ ose ‘Let’s Go Luna!’, vuante prej kohësh. Në fakt, në prill 2021 e kishte bërë publike sëmundjen e saj: “Unë kam kancer. Mund të prekë këdo. Imagjinoj që nëse dikush tjetër me kancer më sheh duke kaluar këtë, ndoshta do t’i japë edhe pak forcë. Kimioterapia do të jetë udhëtimi im më i vështirë ende, por do të më bëjë më të fortë se sa kam qenë ndonjëherë”, shkroi ajo në atë kohë.
