Një mjek, serb i Bosnjës ka fshehur eshtrat e viktimave të Srebrenicës në oborrin e tij, pasi i ka përdorur ato “për t’u përgatitur për operacione”.
Njerëzit në Bërçko, ku punon mjeku Nebojsha Mraoviq, janë të tronditur.
Por, kur Radio Evropa e Lirë ka telefonuar zyrën e tij, ai ishte ende duke punuar atje.
Mjeku punon i lirë edhe pse është provuar se ai ka fshehur eshtrat e viktimave të gjenocidit në oborrin e shtëpisë së tij.
Ai ka klinikën e tij të traumës ortopedike në adresën “Dr. Pajic Medicala”.
REL e telefonoi atë në zyrë. “Nuk kam kohë, nuk do bëj asnjë deklaratë”, ka thënë Mraoviq.
Mraoviq fshehu në oborrin e tij eshtrat e dy viktimave të gjenocidit në Srebrenicë. Ato u betonuan në shatërvanin që ndodhet në oborrin e shtëpisë private.
Mraoviq i solli eshtrat në Brçko nga pylli në vitin 1997 dhe i varrosi në vitin 2012.
Ai më herët ka thënë se nuk sheh asgjë të diskutueshme në këtë rast, duke thënë se eshtrat janë përdorur për “operacione planifikuese”.
“Unë i përdora ato në spital, për planifikimin e operacioneve, ato u bënë të dobishme për qindra njerëz”, tha ai në shtator.
REL
