Komisioneri i Zgjerimit Oliver Varhelyi i quajti deputetët “idiotë” në Parlamentin Europian. Deputetët evropianë kërkuan dorëheqjen e Komisionerit për Zgjerim, Oliver Varhelyi, për shkak të incidentit të djeshëm në Parlamentin Evropian (PE), ndërkohë që komisioneri po i përgjigjej pyetjeve të deputetëve për zgjerimin në Ballkanin Perëndimor.
Kamerat mundën të filmonin momentin kur komisioneri hungarez Varhelyi i quajti deputetët “idiotë”. Pasi iu përgjigj një pyetjeje të një deputeti, ai u ul në vendin e tij dhe tha në hungarisht “sa idiotë të tjerë ka?”
Deputetët po kërkojnë hetim për komisionerin. Kështu tha deputeti hungarez i opozitës së qendrës së majtë Csaba Molnar se PE “duhet të kërkojë dorëheqjen e tij”. Varhelyi sot kërkoi falje dhe tha se ishte një bisedë private me shefin e kabinetit të tij që lidhej me një temë tjetër.
“Më vjen sinqerisht keq për keqkuptimin në lidhje me vërejtjen time në seancën plenare të Parlamentit Evropian më 14 shkurt 2023. Kjo lidhej me një bisedë private dhe të vazhdueshme në hungarisht mes meje dhe shefit tim për një çështje krejtësisht tjetër, e cila ishte nxjerrë jashtë kontekstit. Kërkoj falje për çdo keqkuptim rreth kësaj”, ka shkruar ai.
Ai shtoi se respekton plotësisht “të gjitha institucionet e BE-së, përfshirë Parlamentin Evropian dhe anëtarët e tij të shquar”.
“Dëshiroj të falënderoj anëtarët e respektuar të Parlamentit Evropian për shkëmbimin e djeshëm të mendimeve, i cili ishte një mundësi e shkëlqyer për të diskutuar çështje gjeopolitike me rëndësi ekstreme në Ballkanin Perëndimor”, ka shkruar Varhelyi.
Sincerely regret the misunderstanding around my remark at the plenary session of the @Europarl_EN on 14 February 2023.
My statement :https://t.co/rLjp768JEP
— Oliver Varhelyi (@OliverVarhelyi) February 15, 2023
Ai tha se në të ardhmen mbetet i disponueshëm “për shkëmbime me Parlamentin Europian për zhvillimet në fushat e portofolit tim duke respektuar plotësisht detyrimet e mia ndërinstitucionale dhe parimin e bashkëpunimit të sinqertë”.
Kjo nuk është hera e parë që PE kritikon ashpër Varhelyin. Rezoluta e PE e 18 janarit mbi zbatimin e politikës së jashtme dhe të sigurisë të BE përmban një paragraf që i bën thirrje Komisionit Evropian të nisë një “hetim të pavarur dhe të paanshëm” ndaj tij për të përcaktuar nëse sjellja e Komisionerit për Zgjerimin dhe Politikën e Fqinjësisë” shkel kodin e sjelljes “anëtarë të Komisionit”.
j.l./ dita
