Një ngjarje e pazakontë ndodhi në skenën e Royal Opera House në Londër, gjatë një shfaqjeje të operës së Verdit “Il Trovatore”, kur një nga anëtarët e trupës së baletit ngriti flamurin palestinez përballë publikut. Akti, i cili u regjistrua në video dhe u përhap me shpejtësi në rrjetet sociale, ka ngjallur reagime të ndryshme, nga përkrahja e hapur deri te dënimi i veprimit si i papërshtatshëm.
Pamjet tregojnë momentin kur artisti shpalos flamurin në fund të shfaqjes, ndërkohë që dikush nga prapaskena përpiqet t’ia heqë atë nga dora, pa sukses. Veprimi i tij u interpretua nga shumëkush si një deklaratë politike në mbështetje të kauzës palestineze, ndërkohë që të tjerë e quajtën një ndërhyrje të papërshtatshme në një skenë arti.
Pas incidentit, një zëdhënës i Royal Ballet and Opera deklaroi: “Shfaqja e flamurit ishte një veprim i paautorizuar nga artisti. Ai nuk ishte miratuar nga Royal Ballet and Opera dhe përfaqëson një akt krejtësisht të papërshtatshëm”.
Ndërsa disa komentues në internet e kanë përgëzuar guximin e artistit për të ngritur zërin për një çështje globale përmes artit, të tjerë argumentojnë se skena e një institucioni të tillë kulturor nuk është vendi i duhur për protesta politike.
j.l./ dita
