VIDEO: Vuçiç dorovit muzikantët në festën me këngë çetnike, kush është shqiptari përkrah tij?

Të martën në Serbi u zhvillua një ceremoni e madhe për hapjen e seksionit Pakovraće–Požega në autostradën “Miloš Veliki”.

Në këtë ngjarje morën pjesë presidenti serb Aleksandër Vuçiç, kryetarja e parlamentit Ana Brnabić, ministri i Punëve të Brendshme Ivica Daçić, si dhe ministri shqiptar Demo Berisha, i cili është edhe president i Partisë Përparimtare Serbe, përveç disa ministrave të tjerë të kabinetit.

Të ftuarit shijuan një vakt të pasur dhe muzikën me trombistë, ndërsa në pamjet e publikuara në rrjetet sociale shihet Vuçiç duke u relaksuar me një gotë birrë.

Ata u ekzaltuan nga kënga “Garda e Mbretit Petra që marshon”, të cilën presidenti Vuçiç e këndoi me kënaqësi dhe ndoqi ritmin duke ngritur grushtin.

Ai u duk i prekur edhe nga kënga me motive çetnike “Morem plovi jedna mala barka”, që përmban vargjet:

“Nëna e dërgoi të birin të kërkonte,

pastaj të raportonte te Gjenerali Drazha,

Xhaxha Drazho, ku është fëmija im,

ai po ruhet nga bajonetat serbe.”

Kjo këngë, që lavdëron ushtrinë jugosllave pavarësisht masakrave në Bosnje, Kroaci dhe Kosovë, u luajt gjatë ceremonisë, ndërsa Vuçiç i dha muzikantëve para me bujari.

Seksioni i ri i autostradës Pakovraće–Požega, me gjatësi 19.5 kilometra, që u inaugurua nga Vuçiç, kalon nëpër zonat kodrinore mes Çaçakut dhe Pozhegës. Rruga përfshin 35 ura me gjatësi totale 5196 metra, disa mbikalime dhe tre tunele, prej të cilave dy Munjino brdo dhe Laz, janë më të gjatat në autostradat e Serbisë.

Ndërtimi është financuar nga qeveria serbe përmes Ministrisë së Infrastrukturës, ndërsa kontraktori kryesor është kompania kineze China Communications Construction Company.