Policia e Tiranës ka vënë në pranga një 29-vjeçar, si të dyshuar për një seri vjedhjesh në automjete në kryeqytet. Sipas bluve të kryeqytetit në pranga përfundoi shtetasi me inicialet E. N., banues në Tepelenë.
Sipas hetimeve, i riu kishte thyer xhamat e 12 automjeteve gjatë 48 orëve të fundit, duke vjedhur sende personale dhe shuma parash nga brenda tyre. Vetëm gjatë natës së djeshme, ai ka kryer 6 vjedhje në një parkim në zonën e Astirit.
Operacioni u organizua pas denoncimeve të shumta të qytetarëve dhe në bazë të të dhënave të siguruara nga inteligjenca informative.
Ndërkohë, hetimet vijojnë për të zbuluar nëse E. N. ka qenë i përfshirë edhe në raste të tjera vjedhjesh.
Materialet procedurale i janë referuar Prokurorisë, e cila do të kryejë veprimet e mëtejshme ligjore.
“Komisariati i Policisë Nr. 6 ka finalizuar me sukses operacionin e koduar “The End”, duke vënë në pranga një 29-vjeçar të dyshuar për një seri vjedhjesh në automjete. I arrestuari, shtetasi E. N., banues në Tepelenë, dyshohet se ka thyer xhamat e 12 automjeteve gjatë 48 orëve të fundit, duke vjedhur sende personale dhe para nga brenda tyre”, thuhet në njoftimin e policisë.
i.b./dita
