Presidentja e Komisionit Evropian Ursula von der Leyen gjatë pritjes së kryeministrit norvegjez Jonas Gar Ster në Këshillin Evropian në Bruksel e vendosi theksin tek çështja e tarifave amerikane.
Von der Leyen theksoi se masat amerikane rezultojnë në kosto të mëdha për konsumatorët dhe bizneset në Shtetet e Bashkuara, duke theksuar se Evropa mbetet e hapur për negociatat me SHBA.
“Evropa është gjithmonë e gatshme për një marrëveshje të mirë. Prandaj e mbajmë në tavolinë”, tha Ursula von der Leyen.
Megjithatë, presidentja e Komisionit e bëri të qartë se BE-ja është njëlloj e përgatitur të përgjigjet me kundërmasa dhe të mbrojë interesat e saj veçanërisht përballë pasojave indirekte të devijimeve tregtare që rrjedhin nga masat amerikane.
Ajo tha se ishte tashmë në kontakt me lojtarët kryesorë të industrisë brenda Bashkimit për të vendosur mbi hapat e ardhshëm, ndërsa përsëriti nevojën që BE të forcojë tregun e saj të brendshëm duke hequr barrierat e mbetura që rëndojnë mbi konkurrencën në kohë trazirash tregtare.
i.b./dita
