Një ngjarje e rëndë ndodhi në korrik të këtij viti në Milano, ku një 62-vjeçari turk Hayati Aroy, kunat i bosit të mafies turke u ekzekutua nga 3 persona, përfshirë një shqiptar.
Disa muaj pas ngjarjes, janë zbardhur emrat e 3 personave të përfshirë në vrasje.
Mediat italiane raportojnë se në pranga u vu 36-vjeçarja Valentina Peroni, me precedentë penalë për mashtrime, bashkëshorti i saj 38-vjeçar Emanuele Paganini, si dhe 33-vjeçari shqiptari Elvis Simoni, i cili dyshohet si ekzekutor. Hetimet zbuluan se personi u qëllua 30 herë me thikë.
Më pas trupi i pajetë i Aroyos ishte vendosur mbi shtrat dhe ishte spërkatur me zbardhues (klor) dhe kufomës i ishte vënë flaka që ishte përhapur më pas në të gjithë apartamentin.
Nga rindërtimi i ngjarjes ka rezultuar se gruaja, së bashku me persona të tjerë, kishte tentuar të përdorte kartat e kreditit të viktimës në disa salla bastesh dhe ambiente të tjera publike. Nga këtu ka nisur edhe pista e parë hetimore për agjentët e Policisë Kriminale të Milanos.
Nga apartamenti ku qëndronte Aroyo, tre autorët kishin marrë para, karta pagese, një tablet dhe një telefon celular, duke dyshuar se në pajisjet elektronike mund të ndodhej videoja intime.
Në telefonin e të riut me origjinë shqiptare, i sekuestruar nga agjentët e Policisë Kriminale në një tjetër operacion, u gjetën mesazhe të dërguara nga gruaja, ku ajo komentonte vrasjen duke thënë se nuk kishte pasur “as ndjesinë më të vogël”.
“Kisha frikë se mos ndjeja mëshirë, por jo. E shikoja vetëm për të kuptuar nëse do të ndjeja diçka, por asgjë,” shkruante 36-vjeçarja. Kjo bisedë është tashmë pjesë e dosjes hetimore.
j.l./ dita
