Policia ka vënë në pranga Fatmir Manellarin, i cili dy muaj më parë vrau me thikë fqinjin e tij, Safet Hyskollari.
Manellari u arrestua sapo u kthye në shtëpinë e tij në fshatin Gështenjas. Autori i krimit të rëndë qëndroi në arrati për rreth 2 muaj.
Autori i vrasjes ka qëndruar në pyll gjatë arratisë, në një zonë mes Lozhanit dhe Pogradecit. Sipas burimeve, në atë zonë ai dilte për të blerë ushqime. Duket se edhe banorët e zonës nuk e kanë njohur përderisa nuk kanë raportuar në polici.
Dy ditët e fundit ai është kthyer në banesë ku është pikasur nga efektivët dhe është arrestuar. Fakti që ka jetuar për dy muaj në pyll ngre dyshime se ai është kthyer edhe më herët në banesë për të marrë para, të cilat i përdorte për t’u ushqyer.
Mes autorit dhe viktimës Hyskollari ka pasur konflikte të vazhdueshme verbale sa herë viktima kthehej me pushime nga SHBA-ja në fshatin e tij. Konfliktet lidheshin me punimet që viktima kryente në afërsi të shtëpisë, për të ardhur tek konflikti i fundit që ndodhi mbrëmjen e 7 Shtatorit dhe përfundoi me vdekjen e 65-vjeçarit Hyskollari.
Gjatë ditëve të fundit të jetës, viktima kreu punime për zgjerimin e rrugës dhe vendosjen e disa tubave prej betoni. Autori pretendonte pronësinë e ish-kovaçanës së fshatit ku ai ka punuar për shumë vite, godinë, e cila ndodhet përballë banesës së viktimës.
Autori Fatmir Manellari shkoi tek banesa private e viktimës dhe e goditi disa herë me thikë sapo 65-vjeçari doli nga dera. Si pasojë e plagëve Hyskollari ndërroi jetë në spitalin e Pogradecit.
o.j/dita
