Për herë të parë në procesin gjyqësor që po zhvillohet ndaj tij dhe disa personave të tjerë në Gjykatën Kundër Korrupsionit dhe Krimit të Organizuar, Dritan (Gramos) Rexhepi, i njohur si “mbreti” i kokainës, ka dhënë deklaratën e tij lidhur me rrëmbimin dhe zhdukjen e Jan Prengës.
Rexhepi ka mohuar çdo lidhje me Gentian Funiqin, një nga të akuzuarit në këtë çështje.
“Në burgun e Pratos kam qenë në siguri të lartë pasi kisha apelin në Firence dhe më mbajtën 10 ditë. Nuk e njoh dhe nuk e kam parë ndonjëherë në jetën time Gentian Funiqin. Do ta faktoj këtë me prova në vijim,” ka deklaruar ai.
Në seancën e së enjtes, avokatët mbrojtës të të pandehurve kanë kundërshtuar provat shkresore të paraqitura nga SPAK, duke kërkuar që ato të mos pranohen si të ligjshme në proces.
Jan Prenga u rrëmbye në Kamëz nga katër persona të cilët e futën në një makinë luksoze dhe më pas, sipas pamjeve filmike të nxjerra, ai u dërgua në një resort luksoz në Shijak ku u torturua. Hetimet kanë zbuluar se rrëmbimi i Prengës ka pasur lidhje me veprimet e vëllait të tij, Astrit Prengës, i cili dyshohet të ketë grabitur një sasi prej 260 kg kokainë në Britaninë e Madhe.
Përmes hetimeve është arritur në përfundimin se Gentian Fuqini, një person i lidhur me grupin kriminal nga Shkodra, ka qenë një nga porositësit e rrëmbimit. Ai kontaktoi vëllezërit e Jan Prengës dhe kërkoi që të kthehej sasia e kokainës së grabitur në Britaninë e Madhe në këmbim të jetës së Jan Prengës.
Nga ana tjetër, edhe Dritan Rexhep dyshohet të jetë I përfshirë në këtë ngjarje.
Sipas hetimeve, Rexhepi dyshohet se ishte organizatori i nisjes së kokainës për në Britaninë e Madhe, sasi që më pas u zhduk nga porti i Portsmoouth.
i.b./dita
