Prokuroria e Posaçme SPAK ka regjistruar një hetim sa i përket dyshimeve me abuzimet e fondeve të IPARD nga Ministria e Bujqësisë.
Në një takim informal me gazetarët, kreu i SPAK Altin Dumani dha detaje sa i përket një sërë çështjeve që janë pjesë e punës së kësaj strukture.
Lidhur me fondet e IPARD, pasi çështja u pushua për moskompetencë, ai tha se ka një hetim të ri nga Prokuroria e Posaçme.
Në korrik, Komisioni Europian ndërpreu përkohësisht fondet për Shqipërinë në kuadër të programit IPARD 2, që përdoret për mbështetjen financiare të projekteve në bujqësi.
Kjo masë u mor në kuadër të një hetimi të nisur nga Brukseli, pas akuzave për korrupsion me këto fonde.
Ministria e Bujqësisë dhe Zhvillimit Rural reagoi duke u shprehur se procedura hetimore është normale:
“Ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE.
Këto janë procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara.
Të gjithë strukturat shqiptare janë në bashkëpunim dhe në koordinim të vazhdueshëm me zyrën e OLAF dhe DG AGRI duke ofruar transparencë të plotë.”
o.j/dita
