Afganistani dhe Pakistani kanë rënë dakord për një armëpushim të menjëhershëm në bisedimet e ndërmjetësuara nga Katari dhe Turqia. Kjo erdhi pas një jave sulmesh të ashpra dhe vdekjeprurëse përgjatë kufirit të tyre. Mediat e huaja raportuan se Ministria e Punëve të Jashtme e Katarit tha se Afganistani dhe Pakistani kanë rënë dakord për, armëpushimin dhe krijimin e mekanizmave për të konsoliduar paqen dhe stabilitetin e qëndrueshëm midis dy vendeve.
Doha tha se të dy vendet ranë dakord gjithashtu të zhvillojnë takime pasuese në ditët në vijim për të siguruar qëndrueshmërinë e armëpushimit dhe për të verifikuar zbatimin e tij në një mënyrë të besueshme dhe të qëndrueshme”.
“Siç është premtuar, negociatat me palën pakistaneze do të zhvillohen sot në Doha”, tha zëdhënësi i qeverisë afgane, Zabihullah Mujahid, duke shtuar se ekipi negociator i Kabulit, i udhëhequr nga Ministri i Mbrojtjes, Mullah Muhammad Yaqoob, kishte mbërritur në kryeqytetin e Katarit.
Ministria e Punëve të Jashtme e Pakistanit tha se ministri i mbrojtjes i vendit, Khaëaja Muhammad Asif, kishte udhëhequr diskutimet me përfaqësuesit e udhëheqjes talebane të Afganistanit.
“Bisedimet do të përqendrohen në masat e menjëhershme për t’i dhënë fund terrorizmit ndërkufitar kundër Pakistanit që buron nga Afganistani dhe për të rivendosur paqen dhe stabilitetin përgjatë kufirit pakistanez-afgan”, tha Ministria e Jashtme.
Luftërat ndërkufitare midis aleatëve të dikurshëm dhe sulmet ajrore pakistaneze përgjatë kufirit të tyre të kontestuar prej 2,600 km u shkaktuan pasi Islamabadi kërkoi që Kabuli të frenonte rebelët që kishin shtuar sulmet ndërkufitare në Pakistan. Kjo duke thënë se luftëtarët po vepronin nga streha të sigurta në Afganistan. Talebanët kanë mohuar se u kanë dhënë strehë grupeve të armatosura për të sulmuar Pakistanin dhe akuzojnë ushtrinë pakistaneze për përhapjen e dezinformatave rreth Afganistanit dhe për strehimin e luftëtarëve të lidhur me ISIS-in, të cilët kanë minuar stabilitetin dhe sovranitetin e vendit.
Islamabadi ka mohuar akuzat e Kabulit. Pakistani ka akuzuar Kabulin se ka lejuar grupet e armatosura të banojnë brenda Afganistanit dhe të zhvillojnë luftë për vite me radhë kundër shtetit pakistanez. Kjo në një përpjekje për të përmbysur qeverinë dhe për ta zëvendësuar atë me llojin e tyre të rreptë të sistemit të qeverisjes islamike.
“Regjimi afgan duhet të frenojë përfaqësuesit që kanë streha në Afganistan dhe po përdorin tokën afgane për të kryer sulme të urryera brenda Pakistanit”, tha të shtunën shefi i Ushtrisë Pakistaneze, Marshali i Fushës Asim Munir, duke iu drejtuar një ceremonie diplomimi të kadetëve.
j.l./ dita
