Autoritetet gjermane njoftuan se kanë arrestuar një kardiolog, i dyshuar për vrasjen e pacientëve të tij, duke u injektuar “me vetëdije” doza shumë të larta qetësuesish, siç raportohet nga Policia e Berlinit. Mjeku punonte në spitalin Charité në kryeqytetin gjerman, qendër nga e cila u pezullua verën e kaluar kur u hetua.
“Burri 55-vjeçar, i cili u pezullua nga Charité në gusht 2022, dyshohet se ka administruar me vetëdije doza kaq të larta të një qetësuesi për pacientët e sëmurë rëndë në njësinë e kujdesit intensiv në dy raste në 2021 dhe 2022, të cilët përfunduan me vdekje”, thuhet në shënimin e policisë. Historia e ngjashme me një film horror, por edhe precedentë të tjerë në të kaluarën.
Prokuroria gjermane kishte nisur tashmë hetimet pas një raporti të dorëzuar nga vetë spitali, por statusi i “dyshimit urgjent”, niveli më i lartë i dyshimit në ligjin e procedurës penale të vendit, nevojitej për të lëshuar një urdhër arresti. Ky “dyshim urgjent” ka ardhur pas vlerësimit të një eksperti, i cili ka arritur në përfundimin se në të paktën dy nga katër vdekjet e hetuara, dozat e larta të qetësuesve nuk ishin “të justifikueshme nga ana mjekësore”. I pandehuri do dalë përpara një gjyqtari hetues të Gjykatës së Rrethit Tiergarten për të lëshuar urdhër-arrestin. Ndërkohë, një komision vrasjesh nga Zyra e Policisë Kriminale të Shtetit të Berlinit vijon hetimet.
