Erion Braçe, deputeti i Partisë Socialiste, ka folur në programin “NOW me Erla Mëhillin” për largimin e tij nga Divjaka dhe kalimin në Njësinë Nr. 5 në Tiranë.
Ai shpjegoi se për 12 vjet kishte përfaqësuar Divjakën dhe, pas vitit 2017, iu shtuan edhe katër njësi të tjera.
Sipas Braçes, pas humbjes së mikut të tij, Bashkim Finos, në vitin 2021, atij ju shtua dhe një pjesë e qytetit të Lushnjës.
Braçe e pranon se largimi nga Divjaka nuk ishte një proces i lehtë.
“Pa diskutim që largimi nga Divjaka nuk e prita mirë. Edhe një mandat, si deputet, krijon një lidhje njerëzore të ngushtë me zonën që përfaqëson. Më duket sikur bëhet një pjesë e jetës së përditshme. Si deputet, detyra ime është të takohem me njerëzit, të dëgjoj problemet e tyre dhe të ngrej zërin e tyre në parlamen”, theksoi ai.
Braçe shtoi se puna e deputetit është të angazhohet për zgjidhjen e problemeve të qytetarëve dhe të mos qëndrojë pasiv.
“Sistemet duhet të zgjidhin problemet e qytetarëve, por deputeti nuk mund të bëjë sehir. Ai duhet të kërkojë llogari dhe të lobojë për zonën dhe njerëzit e saj”, u shpreh Braçe.
Ai gjithashtu theksoi se lidhja mes deputetit dhe elektoratit është diçka që krijohet natyrshëm.
Në lidhje me kalimin në Njësinë 5, Braçe e përshkroi atë si një hap drejt habitatit të tij.
“Njësia Nr. 5 është në habitatim tim, është shtëpia ime, jam në shtëpinë e nënës time pasi kam dhe prindërit aty. Është një zonë e majtë, e cila ka pasur zhvillime gjatë 35 viteve, duke mos u denatyruar. Është një zonë që duhet kuruar dhe kam bërë një xhiro gati 6 orë për të parë problematikat që banorët përballen aty”, tha Braçe.
j.l./ dita
