Dy foto, një mesazh

Nga Migena Aleksi

​Përplasjet përpara Parlamentit nuk do mbahen mend vetëm për zhurmën, thirrjet, gazin lotsjellës, përplasjen fizike mes forcave të rendit dhe protestuesve.

Dy imazhe të kapura sot jashtë godinës së Kuvendit e zhvendosin vëmendjen te ajo që humbet në kaosin e ngjarjeve të tilla të rënda. Po flas për dimensionin njerëzor dhe thellësinë e krizës shoqërore.

Lulja mbi jelekun mbrojtës

Në foton e parë, një i ri me duar të lidhura me litar vendos me kujdes disa lule të verdha në jelekun mbrojtës të një polici të ri.

Pamja krijon një kontrast të menjëhershëm vizual. Është brishtësia e lules përballë pajisjeve të ftohta të mbrojtjes.

Por më shprehës se simbolika është reagimi i vetë punonjësit të policisë. Një vështrim i palëvizshëm, ku përzihen hutimi, vetëdija dhe reflektimi.

Në atë sekondë, muri i uniformës pushon së qeni i tillë dhe zbulon njeriun pas saj.

​Lodhja në prapaskenë

Fotoja e dytëe marrë nga gazetari i Ditës sot në terren e plotëson të parën duke e parë ngjarjen nga një kënd tjetër. Disa efektivë policie shihen të ulur në trotuar e te shkallët pranë Bibliotekës, duke ngrënë diçka të shpejtë apo thjesht duke pushuar në hije.

Kjo pamje e çmitizon figurën e forcave të rendit si “mjet shtetëror” impersonal.

Ajo nxjerr në pah anën e tyre logjistike e fizike, punonjës që qëndrojnë me orë të tëra nën diell, me uniformë të rëndë, mes  dy zjarreve, mes detyrës zyrtare dhe pakënaqësisë shoqërore.

Pasqyra e një pakënaqësie të madhe

Të marra së bashku, këto dy foto nuk janë vetëm pamje nga një protestë rekord që vazhdon prej 54 ditësh, por pasqyrë e një pakënaqësie shumë të madhe shoqërore që ka kapërcyer kufijtë e politikës ditore.

Ato shfaqin vulnerabilitetin dypalësh. Nga njëra anë qytetarin e revoltuar që kërkon të komunikojë dëshpërimisht përmes një simboli paqeje, dhe nga ana tjetër policin e ri që mban mbi supe barrën e një rendi të tensionuar, pasi duhet të mbrojë një qeverisje të korruptuar.

Është e qartë se kur revolta qytetare arrin te lulja mbi armaturë dhe te vështrimi reflektues i efektivit, kjo përplasje nuk është me policinë, por me një realitet shoqëror që ka arritur pikën e vlimit.

Këto imazhe botuar nga DITA dëshmojnë se fryma e pakënaqësisë i ka prekur njëlloj të gjithë njerëzit e këtij vendi, pavarësisht nëse ndodhen përpara apo prapa kordonit të sigurisë.

DITA