Është momenti për të mësuar fituesin e Kupës së Italisë. Zikaltrit synojnë të triumfojnë në finalen e dytë të sezonit, pas suksesit në Superkupë, përballë Milanit, ndërsa me 10 qershor do të luajnë edhe finalen e madhe të Championsit me Man. City-n. Trajneri i Interit, Simone Inzaghi, në prononcimin përpara finales vlerësoi ekipin e Fiorentinës. “Është një ndeshje finale, kam luajtur disa dhe ndonjëherë ka pasur favoritë dhe jo favoritë. Ne do të përballemi me një ekip të fortë, që në 24 ndeshjet e fundit ka humbur vetëm katër dhe ka fituar pothuajse gjithmonë. Jemi të vetëdijshëm se kë ekip do të kemi përballë. Ata, njësoj si ne, i kanë merituar të dy finalet e arritura, do të jetë një sfidë e hapur, por ne duhet të luajmë si ekip për të fituar”. Në Itali, trajneri Simone Inzaghi cilësohet si specialist i finaleve të kupave.
“Shpresoj që tradita të vazhdojë, sepse kemi edhe dy finale për të luajtur. Jam i lumtur dhe më duhet vetëm të falënderoj grupin. Në muajt e fundit kemi bërë gjëra të rëndësishme, njëra prej tyre është edhe arritja e finales së Kupës së Italisë. Edhe në kampionat kemi bërë mirë dhe na mungon vetëm një hap i vogël për të siguruar pjesëmarrjen në Champions League. Arritja më e rëndësishme është pa dyshim finalja e Champions League, e papritur për shumicën, por ne kemi besuar dhe jemi këtu ku jemi.“Inzaghi u shpreh në fund të intervistës se do të jetë 100% trajner i Interit edhe sezonin e ardhshëm dhe se asnjëherë nuk është ndier në rrezik”.
Konferenca e teknikut të Fiorentinës
Gjithçka është gati në Romë për finalen e Kupës së Italisë. Në letër, Fiorentina nuk e nis si favorite kundër Interit, por trajneri Vincenzo Italiano premton betejë. “Është një ndjenjë krenarie të luash në finale. Duhet të bëjmë gjithçka për ta vënë Interin në vështirësi. Ne kemi nevojë për një paraqitje si ajo në Bazel. Do të luajmë shanset tona. Kemi arritur deri këtu dhe do të përpiqemi të fitojmë”.
Numri një i pankinës së Fiorentinës, komentoi edhe duelin mes tij dhe Simone Inzaghit: “Përveç cilësisë së madhe të lojtarëve dhe kampionëve që ata kanë në organikë, Interi ka edhe një trajner që di të shkojë shpesh në finale dhe që di edhe t’i fitojë. Inzaghi është një specialist, nuk e fsheh dot. Në sfidat finale, me të cilat jam përballur deri tani, kam kuptuar që nuk duhet të humbasësh kurrë besimin tënd. Çfarëdo që të ndodhë, do të duhet të përveshim mëngët dhe të luajmë edhe tri ndeshjet e tjera që janë shumë të rëndësishme: dy në kampionat dhe finalen e Conference League. Sfida përballë Interit është prova jonë e parë për të treguar cilësitë tona dhe për të treguar se e kemi merituar për të arritur deri këtu”. Finalja e Kupës së Italisë, Fiorentina – Inter, do të startojë në orën 21:00.
