Nga Migena Aleksi
Një nga deklaratat antiprotestë gjatë këtyre ditëve ka qenë: “Po largoni dhe frikësoni turistët e huaj po dëmtohen bizneset”.
Shoqëria zgjohet për të mbrojtur dinjitetin dhe pasurinë e saj publike, propaganda kujtohet papritur për xhepat e bizneseve.
Siç ndodh rëndom me gënjeshtrat, realiteti i zhvesh ato brenda pak sekondave. Ky imazh i shkëputur nga protesta e fundit tregon një djalë të ri, një turist të huaj, i cili jo vetëm që nuk ka ikur i tmerruar drejt aeroportit, por qëndron në mes të sheshit.
Në duart e tij, është shkruar me karton e laps: “I’M NOT SCARED!!” (Nuk jam i frikësuar!).
Turistët e vërtetë, ata që nuk vijnë për të parë thjesht resorte betoni por kërkojnë shpirtin autentik të një vendi, nuk tmerrohen nga qytetarë që kërkojnë të drejtat e tyre. Përkundrazi, bashkohen me ta.
Një popull që reagon është garancia më e madhe për një vend të gjallë dhe europian. Frika nuk është e turistëve. Frika është e atyre që e përdorin turizmin si mburojë për të fshehur zullumet e veta.
DITA
