Stefano Addeo, një mësues italian, është vënë në qendër të kritikave pas një postimi të rëndë në rrjetet sociale ku i uronte vdekjen vajzës së kryeministres Giorgia Meloni. I ndodhur nën trysni të madhe publike dhe institucionale, ai ka dalë publikisht për të kërkuar ndjesë, duke pretenduar se mesazhi nuk ishte i tij, por i krijuar nga inteligjenca artificiale ChatGPT.
Në një intervistë për gazetën La Repubblica, Addeo tha se ishte i irrituar nga qëndrimi i qeverisë italiane lidhur me luftën në Izrael dhe i kërkoi AI-së ta ndihmonte për të shkruar një mesazh kritik ndaj Melonit. Pa e lexuar me kujdes, ai e publikoi mesazhin në rrjetet sociale, një veprim që e cilëson si gabimin më të madh të jetës së tij.
Addeo përshkruan veten si një njeri me bindje të forta humanitare: “Jam katolik, kundër dhunës, vegjetarian dhe angazhohem për të ndihmuar fëmijët. Ajo që ndodhi është e kundërta e vlerave të mia.” Ai shton se edhe nxënësit e tij e kanë mbështetur, pasi e njohin si mësues dhe si njeri.
Pavarësisht se e fshiu postimin menjëherë, autoritetet italiane kanë nisur hetime ndaj tij. Ministria e Arsimit ka hapur një çështje disiplinore, ndërsa drejtuesit e shkollës janë distancuar nga rasti.
“Jam i vetëdijshëm për pasojat e rënda që ka ky veprim. Dua vetëm t’i kërkoj ndjesë kryeministres dhe vajzës së saj. Nëse do ta takoja Giorgia Melonin, do e përqafoja dhe do i kërkoja falje me lot në sy. Vajzës së saj i uroj gjithë të mirat,” u shpreh mësuesi, i cili shton se ndodhet në një gjendje të vështirë emocionale dhe është i shqetësuar për sigurinë e tij personale.
Ngjarja ka shkaktuar debat të gjerë në Itali, jo vetëm për përmbajtjen e postimit, por edhe për përdorimin e pakujdesshëm të inteligjencës artificiale në diskursin publik.
