I penduari i drejtësisë për dosjen ‘Plumbi i Artë’ Nuredin Dumani ka vijuar dëshmitë në seancën gjyqësore ditën e sotme. Në seancën e sotme, Dumani ka treguar për komunikimet me të pandehurin Erion Alibej në ‘SKY ECC’. Dumani po ashtu rrëfeu dhe një episod që ka ndodhur në vitin 2020, kur është larguar për në Kosovë nga dogana e Morinës, teksa ishte i kërkuar për vrasje.
“Me Erion Alibej komunikoja me ‘sky’. Nuk më kujtohet ku kam qenë kur është arrestuar Alibej. Në burgun e Elbasanit kam komunikuar me të. Hera e fundit ka qenë dy tre ditë pas vrasjes së Arjan Spahisë. U transferua Erioni dhe humba komunikimin. Për Kosovë jam larguar në 2020, kam qenë në kërkim për ngjarjen e vëllezëve Haxhia dhe Dorjan Shkozës. Kalova në doganë me makinë. Isha pasagjer, isha me dy miq të mi. S’na kontrolloi asnjërin, ishim të tre në kërkim. Ditën ka qenë. Kam qëndruar në Kosovë deri ditën kur i ra Rusia Ukrainës”, tha Dumani.
Nuredin Dumani, një nga emrat më të përfolur në botën e krimit, u vu në pranga mbrëmjen e 29 marsit të vitit 2022 në Fier, pak pasi kishte marrë mjekim për plagosje në shpinë nga tre mjekë në një shtëpi private. Pas burgosjes, Dumani u bë bashkëpunëtor i drejtësisë dhe dëshmitë e tij kanë zbuluar disa nga ngjarjet më të rënda kriminale në vendin tonë.
j.l./ dita
