Pak ditë më parë, u bë e ditur nga gazetarja Klodiana Lala, se kryebashkiaku (në burg) i Himarës, Fredi Beleri ka qenë dëshmitar në gjyqin e zhvilluar në Greqi ndaj të shumëkërkuarit të drejtësisë shqiptare, Bledar Jambelli, personi që ekzekutoi kryekomisarin Artan Cuku.
Dosja shkruan se Beleri nuk ka qenë ndihmesa e vetme që Jambelli të mos ekstradohej në Shqipëri.
Sipas burimit konfidencial, edhe Kostandina Bezhani, ish-zv ministre dhe aktualisht kryetare e Minoriteteve në Shqipëri, e cila u thirr në gjykatë dhe aty me cilësinë e zyrtares ka deklaruar se Jambelli nuk duhet të ekstradohet se është vorio-epiriot, e se ka mbrojtur Kishat e Fierit nga sulmi çam.
Kujtojmë se Bezhani është vajza e Theodhori Bezhanit, themeluesit të ‘Omonias’, i cili ka qenë i dënuar në Shqipëri.
Kush është Bledar Jambelli?
Jambelli akuzohet si personi që urdhëroi Mikel Shallarin për të ekzekutuar kryekomisarin Artan Cuku.
I njohur ndryshe si Rikard Muho, nga fshati Mbrostar i Fierit konsiderohet vrasës me pagesë. Ai u arrestua në vitin 2019 në Greqi, por shteti grek refuzoi ta ekstradonte.
Në atë kohë në media u përfol se autoritetet shqiptare kishin neglizhuar dhe zvarritur qëllimisht procedurat për ekstradimin e tij.
Jambelli u arrestua sërish nga policia greke në korrik 2022, së bashku me Kristaq Lecin, pasi dyshohej se ishin përfshirë në një përplasje me armë mes bandave ku mbetën të plagosur tre persona.
p.c. / dita
