Ky është gjarpëri i egër më i gjatë në botë

Në jug të ishullit Sulawesi, në Indonezi, është dokumentuar gjarpri i egër më i gjatë i matur ndonjëherë në histori.

Bëhet fjalë për një femër të pitonit të rrjetëzuar (Malayopython reticulatus) plot 7,22 metra e gjatë dhe me një peshë prej 96,5 kg.

Matja zyrtare, e kryer në janar të vitit 2026, e bëri këtë ekzemplar pjesë të Librit të Rekordeve Guinness me një primat të ri botëror.

Pitoni është pagëzuar me emrin “Ibu Baron”, që do të thotë “Baronesha”, dhe ka thyer rekordin e mëparshëm të vitit 1999 të një pitoni tjetër për rreth 25 centimetra.

Në fakt, kjo specie gjarpërinjsh shtrëngues (jo helmues) me origjinë nga Azia Juglindore njihet tashmë si lloji që përfshin gjarpërinjtë më të gjatë në botë, me një gjatësi mesatare 5-6 metra.

“Baronesha” u mat plotësisht zgjuar për të shmangur rreziqet e anestezisë. Duke qenë se gjarpërinjtë mund të zgjaten deri në 10% më shumë kur muskulatura e tyre është plotësisht e lëshuar nën qetësues, shkencëtarët dyshojnë se gjatësia e saj reale, po të ishte e relaksuar, mund t’i afrohej madje 8 metrave (7,90 m).

Emri “i rrjetëzuar” vjen pikërisht nga lëkura e tij e pagabueshme me motive “rrjetë”, e cila shërben si kamuflazh i përsosur. Përpara këtij zbulimi, rekordi për gjarpërin e egër më të gjatë i takonte një femre prej 6,95 metrash, e matur në vitin 1999 në Borneo.

Megjithatë, këtu flasim vetëm për kafshët në gjendje të lirë. Nëse kalojmë te gjarpërinjtë e rritur në robëri, rekordi i takon një tjetër pitoni të rrjetëzuar: një femër e quajtur “Medusa” në Misuri (SHBA), ka arritur gjatësinë e pabesueshme prej 7,67 metrash.

Pavarësisht përmasave të tyre, pitonët e rrjetëzuar janë shumë më tepër në rrezik nga ne sesa ne prej tyre. Si predatorë oportunistë, ndodh që ata t’u afrohen qendrave të banuara në kërkim të preve, duke sulmuar bagëtinë ose kafshët shtëpiake, por rrallëherë, qeniet njerëzore.

Për këtë arsye, ata shpesh vriten nga banorët vendas për frikë parandaluese. Gjithashtu, çdo vit shumë ekzemplarë gjuhen për tregun e modës dhe mjekësinë alternative.

Pitoni i rrjetëzuar është i përhapur në Azinë Juglindore, nga Bangladeshi deri në Indonezi dhe Filipine. Pitonët e rrjetëzuar nuk janë helmues. Ata janë gjarpërinj shtrëngues që e imobilizojnë prenë duke përdorur unazat e tyre të fuqishme.

d.x. / dita